Бырабыыталыстыба биэнсийэни уонна босуобуйаны сыл устатын тухары эбии индексируйдуон сөп, маны таһынан, хамнас төлөнүүтүн уонна айах ииттии (прожиточный минимум) муҥутаан кыра суумматын хаттаан көрүөҕэ. Саҥа чэпчэтиилэри уонна преференциялары урбааннар ылыахтара. «Российская газета» суруйарынан, бу сокуон дойду олохтоохторун уонна урбааны Арассыыйа утары үөскээбит санкциялартан көмүскүөхтээх. Бу – нэһилиэнньэни уонна дойду экэниэмикэтин өйүүр туһуттан, кириисис утары ылыныллыбыт бастакы бакыат.
Сокуон бырабыыталыстыбаны социальнай төлөбүрдэр көрүҥнэрин эбии индексациялыырыгар, суһал быһаарыныыны ылынарыгар уонна биэнсийэ коэфициенын, страховой биэнсийэ төлөбүрүн улаатыннарар быраабы биэрэр.
Маны таһынан, тас дойдуларга үөрэнэ сылдьан уустуктары көрсүбүт дьоҥҥо, дойдубут үрдүк үөрэҕин кыһаларыгар киирии бырассыаһа судургутуллан биэрэр. Кыра уонна орто урбаан бэрэстэбиитэллэрэ 2021 сыллаахха кирэдиит ылбыт буоллахтарына, кирэдииттэригэр каникул ылалларыгар быраап бэриллэр. Маныаха, кинилэр кредиторга болдьоҕу уһатан биэрэллэрин курдук көрдөһүүлээх балаҕан ыйын 30 күнүгэр диэри тиийиэхтэрин сөп.
Даҕатан этэр буоллахха, бу докумуон урбаан былаанабай бэрэбиэркэтин олохтуурга мораторий киллэрэр. Өскөтүн, бу урбаанньыттарга, кыра уонна орто тэрилтэлэргэ 2022 сыллаахха диэри тохтуур эбит буоллаҕына, Арассыыйа иһигэр баар аккредитованнай IT-хампаанньаларга бу бобуу 2024 сыл ахсынньы 31 күнүгэр диэри дьайыаҕа. Маны таһынан, информационнай технология эйгэтигэр үлэлиир тэрилтэлэр нолуоктан үс сыл босхолоноллор.
Бырабыыталыстыба быһаарыытынан, урбаан бэйэтин үлэтин лицензиятын уонна көҥүлү уһаттарыыта суох салҕыан сөп. Эбиитин, матырыйааллары уонна өссө даҕаны атын кэмпилиэктэри тас дойдуттан аҕалыыга кыһалҕаны көрүспүт буоллахтарына, хантараак сүрүн усулуобуйаларын уларытыыга көҥүл баар буолар.
Бэликилииникэлэр уонна балыыһалар судургутуллубут схеманан, эми-тому, ороскуоттанар матырыйаалларын уонна тэриллэрин 50 мөл. сууммаҕа диэри ылар кыахтаныахтара.
Тутуу эйгэтигэр, бэйэлэрин дьаһанар тэрилтэлэр бэйэлэрин чилиэннэригэр компенсационнай пуонда үбүттэн иэс биэрэр кыахтарын болдьоҕо уһаан биэрэр.
