Александр Атласов “Үүт харчыта үрдэтиллиэ эрээри, төһө буоларын этэргэ эрдэ” диэн этиитигэр санаабын үллэстэбин.
Үөһээ Бүлүү улууһа ТХМ-тан 2011 с. тыа хаһаайыстыбатын боломуочуйата улуустарга бэриллибитигэр балаһыанньа оҥорон, улуус депутаттарын сэбиэтинэн бигэргэтэн, баһылык В.С. Поскачин дьаһала тахсыбыта. УСХ ол кэмҥэ үлэлии олорбут «Чолбон» СПОК үүтү тутар-астыыр кэпэрэтиип усчуотугар биир кэлтэгэй кэппиэйкэ аҥаарын ыыппакка, нэһилиэк потребительскай кэпэрэтииптэрин нөҥүө кэтэх ыалларга туттарбыт үүттэригэр быһа үүт субсидиятын ыыппыта. Онтон КФХ-ларга тус бэйэлэрин усчуоттарыгар. Ити 2012 с. соҕотуопсук биир киилэни тутар сыаната 4 солк. этэ.
Үүт субсидията «Чолбон” СПОК түспэтэҕин быһыытынан, кэпэрэтиип үүтү 4 солкуобайга тутан астаан, атыылаан, онтон киирбит харчытынан тэрилтэтин ороскуотун, нолуогун, үлэһиттэрин хамнаһын төлөөн олорбута. Кэлин соҕотуопка сыаната 7-10 солк. буолбутун кэннэ, 2015 сылга диэри ити мэхэниисиминэн үлэлээбитэ .
Былырыын Ороһуга Сортолова диэн урбаанньыт ТХМ-тан биир кэлтэгэй кэппиэйкэ «Возмещение части затрат сырого молока” диэн үүт субсидиятын ылбакка, кэтэх ыаллартан 30 тн үүтү туппута.
Сорохтор үлэни-хамнаһы билбэт, эбэтэр үрдүнэн-аннынан күдээринэ билэр өттүлэрэ - кыраны туппут диэн сипсиһэллэр.
«Мила» маҕаһыынҥа Ньурба улууһун “Влада” диэн үүтү тутар-астыыр тэрилтэтин үүтэ кэлэн атыыланар. Биир киилэлээх иһит - 120 солк. Биир киилэ үүт тутуллар сыаната 10 солк. буоллаҕына, ол аата үүт тутар 10 төгүл барыыстаах буолбатах дуо?.
Дьиҥ иһигэр эттэххэ, тыа собуоттарыгар 1 киилэ күөх үүт иһин 1 солк. үүт туттарааччыттан тутан ылаллар.
Ол аата соҕотуопсук тутар сыаната дьиҥнээҕэ 9 солк. буолан тахсар. Үгүстэр биири өйдөөбөттөр: үүт субсидията 70 солкуобай да буоллаҕына, бу судаарыстыба үүт туттарааччыга биэрэр көмөтө буолар. Син-биир кэтэх ыал ыанар ынаҕар бэриллэр 35 тыһ. солк. курдук. Ол субсидия билигин КФХ-ларга уонна тэрээһиннээх хаһаайыстыбаларга бэриллэр.
Бу харчы үүт туттарааччыга быһа бэриллэрин үөһээ Бүлүүлэр 2012-2015 сс. хааччыйан турабыт. Өссө соҕотуопсук үүт субсидиятын ылбакка даҕаны барыстаах үлэлиир кыахтааҕын дакаастаабыппыт!
З сыл диэн уһун болдьох, 3 ый да, 3 хонук да буолбатах .
Соҕотуопсук тутар сыанатын 15 солк. гынар олох кыра, 20 солкуобай гыныллыахтаах.
Суорат, кефир күөх үүттэн - босхо сырьеттан оҥоһуллаллар, оттон киилэтэ 90 солк. атыыланаллар.
Ити үлүгэр сыанаҕа атыылаан барыһырдаллар, үүт туттарааччыга баара суоҕа 10 эрэ солк. төлүүллэр.
Онон үүт туттарыыгар соҕотуопсук сыанатын уонна судаарыстыба биэрэр көмөтүн булкуйар олох табыллыбат.
Ст. Дмитриев, Үөһээ Бүлүү Балаҕаннаах нэһилиэгин баһылыга.
