Дойдубутугар А4 кумааҕы дэписиитэ суох буолуоҕа. Ол эбэтэр, Арассыыйатааҕы оҥорон таһаарааччылар офис үлэтигэр туттар кумааҕыбытын оҥорон, дойдуну хааччыйар кыахтаахтар. Ити эрээри, билиҥҥитэ табаары ырыынакка киллэрии боппуруоһа быһаарылла турар эбит. Бу туһунан, Арассыыйа Бырамыысыланнаска уонна атыыга-эргиэҥҥэ министиэристибэтэ иһитиннэрэр.
"Офис кумааҕытын ырыынага олохтоох оҥорон таһаарааччыларынан хааччыллар. Билигин Арассыыйаҕа офис кумааҕытын оҥорооччу үс улахан тэрилтэ баар. Ити хампаанньалар бородууксуйаларын дойдубутугар эрэ буолбакка, тас дойдуларга эмиэ тиксэрэр этилэр", - диэн биэдимистибэҕэ сырдаталлар.
Арай, биллэринэн, Финляндия сорох хампаанньата биһиги дойдубутугар кумааҕыны ыыта олорбут эбит. Ол иһин, кумааҕы дэписиититтэн сылтаан Судаарыстыбаннай биир кэлим эксээмэни көһөрүү туһунан сураҕы Үөрэҕирии Министиэристибэтэ олоҕо суоҕунан ааҕар.
Офис кумааҕытын олохтоох оҥорон таһаарааччы дойдуга бэйэтин бородууксуйатын күүскэ тарҕатыытыгар үлэтин ыытар. Маныаха, оҥорон таһаарыытыгар туһанар тастан киирэр химиката кэлбэт буолбут кыһалҕатыгар үөрэнэн, бэйэтэ атыннык оҥорон таһаарар ньыманы тобулбут.
"Өссө биирдэ тоһоҕолоон этэбит, дойдубут оҥорон таһаарааччылара олохтоох ырыынагы хааччыйыахтара. Онон, офис кумааҕытын дэписиитэ суох буолуоҕа",- диэн биэдимистибэ пресс-сулууспатыгар этэллэр.
Санатар буоллахха, арҕаа дойдулар улахан хампаанньалара Stona Enso, UPM, Sappi, Atctic Paper Арассыыйаттан баралларын туһунан биллэрбиттэрэ
Кулун тутар 18 күнүгэр, Арассыыйаҕа ойуур маһын таҥастааччылар уонна маһы атыылааччылар Сойуустарын вице-бэрэсидьиэнэ Андрей Фролов бэлиэтииринэн, дойдуга кумааҕы хайа даҕаны көрүҥүн дэписиитэ суох буолуоҕа.
"Айманымаҥ. Офис кумааҕытын, хаһыат уонна сурунаал кумааҕытын, туалет уонна соттор кумааҕы дэписиитэ суох буолуоҕа",- диэн Фролов эппит.
Туһаныллыбыт сигэтэ: www.rbk.ru
