РФ атыыга-эргиэҥҥэ министиэристибэтин өйөбүлүнэн Саха сирин урбаанын сайыннарар пуонда иһинэн Бырамыысалыннаһы сайыннарар пуонда тэриллэр. Саҥа пуонда нөҥүө бырамыысалыннаска тас дойду бородууксуйатын солбуйарга туһуламмыт бырайыактар үбүнэн-харчынан өйөбүл ылыахтара. Ол туһунан СӨ быраабыыталыстыбатын бэрэссэдээтэлэ Андрей Тарасенко тустаах биэдэмистибэлэр салайааччыларын кытта сүбэ мунньаҕар иһитиннэрдэ.
Саха сирин бырамыысалыннаһын тэрилтэлэригэр сойуому биэрии бэрээдэгин уонна болдьоҕун сотору чопчулуох буоллулар. Онуоха сүрүн ирдэбил тас дойду бородууксуйатын солбуйуу бэлиитикэтигэр сөп түбэһии уонна үлэ миэстэтин хааччыйыы буолар.
Бу иннинэ ойуур маһын таҥастааһыҥҥа уонна чэпчэки бырамыысалыннаска, эми-тому оҥорон таһаарыыга, металлургияҕа өйөбүл олохтонорун туһунан кэпсээбиттэрэ. Ити хайысханан үлэлиир тэрилтэлэр 1-3%-наах сойуому 5 сылга диэри болдьохтоох ылыахтара.
Тас дойду бородууксуйатын солбуйууга федеральнай уонна региональнай бүддьүөттэн 273 мөл. тахса үп көрүллүөҕэ.
