Киир

Киир

Бу күннэргэ Аллараа Бэстээххэ бородуукталардаах, ньиэптээх уонна эгэлгэ табаардаах 426 вагон кэллэ. Бу туһунан Саха сирин Бырабыыталыстыбатын Бэрэссэдээтэлин солбуйааччы Михаил Никифоров кулун тутар 30 күнүгэр, брифинг кэмигэр эппит.

Кини бэлиэтээбитинэн, кулун тутар 29 күнүгэр, өрөспүүбүлүкэ Ил Дархана салалталаах ырыынак тэрилтэлэрэ бигэтик үлэлииллэрин хааччыйар суһал ыстаабын мунньаҕа ыытыллыбытын түмүгэр, Айсен Николаев
“Аллараа Бэстээх” ыстаансыйаҕа табаар кэлиитин күүһүрдэр туһугар дьаһал биэрбит.

Михаил Никифоров сырдаппытынан, өрөспүүбүлүкэҕэ саахар биирдиилээн атыыланыытын саппааһа 66 хонукка, оттон кууһунан атыыга 147 хонукка тиийэр. Оттон атын бородуукталары ылан көрөр буоллахха, мас арыыта биирдиилээн атыыга 72, кууһунан 92 хонукка диэри, гречкэ 67 уонна 82 хонукка тиийэр сапаастаахтар эбит.

Бу күннэргэ тимир суол ыстаансыйаларын ситимнэринэн өрөспүүбүлүкэбитигэр диэри 1948 вагон айаннаан иһэр, олортон «Аллараа Бэстээх» ыстаансыйаҕа 1329 вагон кэлэн иһэр.

Саха Өрөспүүбүлүкэтин Судаарыстыбаннай Сыана кэмитиэтэ СӨ Борокуратууратын кытта күн ахсын бородууктаҕа олоҕо суох сыана үрдээһинэ тахсыбатын туһугар үлэ ыытар.

Өрөспүүбүлүкэҕэ кэнники 3 күн иһигэр 3%-ҥа диэри үрдээбит сыаналардаах бородуукталар: куурусса этэ, арыы, гречка, саахар, чэй уо.д.а. Оттон 2%-ҥа диэри ас-үөл 15 көрүҥэр сыана түспүт: ынах этэ, сибиинньэ этэ, балык, сымыыт уо. д. а.

 СӨ Ил Дарханын уонна Бырабыыталыстыбатын пресс-сулууспата

Тарҕат:

Санааҕын суруй