Германия Үпкэ миниистирэ Кристиан Линднер этэринэн, Арассыыйа эниэргийэлээх ресурстарыттан эмискэччи аккаастаныы төттөрүтүн Арассыыйатааҕар Евросойууска куһаҕан охсуулаах буолуо диэн эттэ. Онон, кини Арассыыйа гааһын, ньиэбин уонна чоҕун утары сааҥсыйалары өссө биирдэ булгуччу көрөргө диэн ыҥырда.
Кини Евросойуус Арассыыйа утары бэһис сааҥсыйалардаах бакыакка гааһы уонна ньиэби ылыыны бобуу туһунан боппуруоска маннык хоруйдаабыт:
«Биһиги Арассыыйаны кытта түргэнник экономическэй сибээһи быһа охсуохтаахпыт өйдөнөр. Биһиги кытаанах сааҥсыйалары былаанныахтаахпыт, ол эрээри, кылгас кэм иһигэр гааһы тугунан даҕаны солбуйбаппыт. Биһиги кинилэргэ буолуох, бэйэбитигэр ордук күүстээх охсууну оҥоруохпут».
Линднер бэлиэтээбитинэн, Евросойуус Арассыыйаттан ньиэби, гааһы уонна чоҕу хааччахтааһыны туспа көрөр ордук. Тоҕо диэтэр, ити хас биирдии көрүҥ эниэргийэ ресурсаларын солбудаһыктарын көрдүүргэ бириэмэ ирдэнэр.
2021 сыллаахха Евросойуус Арассыыйаттан €99 млрд сууммаҕа, ол эбэтэр 62,5% Арассыыйаттан эниэргийэ ресурсаларын ылбыт эбит. Евросойуус дойдулара сиикэй ньиэби Арассыыйаттан €48,5 млрд, ньиэп бородуукталарын - €22,4 млрд, айылҕа гааһын €17,8 млрд уонна чоҕу €5,1 млрд сууммаларга ылбыттар. Бу туһунан Евросойуус хамыыһыйатын дааннайдарыттан көрбүттэр.
Германия буоллаҕына, «Газспром» урукку «оҕотун» тас дойдуга салайа сылдьыбыт эбит.
Кулун тутар 21 күнүгэр, Reuters-кэ биллэрбиттэринэн, Брюссель Арассыыйа утары саҥа 5-с бакыат сааҥсыйаны олохтоору гыммыт эбит. Бу эгиэнистибэ источниктара этэллэринэн, биир хаарыллыан сөптөөх миэрэнэн Арассыыйа ньиэбин тохтотуу буолбут. The Wall Street Journal суруйбуттарынан, Евросойууска маннык хааччахтааһыны өйүүллэр эбит, ол эрээри, гаас импордун хааччаҕын туһунан ырытыллыбатах. Гынан баран, муус устар 2 күнүгэр, экономикаҕа еврокомиссар Паоло Джентолини чопчулаабытынан, бэһис бакыат сааҥсыйалар эниэргийэ сиэктэрин хаарыйыа суохтаахтар эбит.
Арассыыйаттан кэлэр ньиэби уонна гааһы тохтотууну эрдэ Австрия уонна Германия биллэрэ сылдьыбыт эбит. Кулун тутар 10 күнүгэр, Еврокомисся биһиги дойдубут эниэргийэлээх ресрустарыттан аккаастаныыны түргэтэтии туһунан бырайыак-былааны көрдөрбүт эбит. Өскөтүн былааны охоххо киллэрдэхтэринэ, 2022 сыл бүтүүтэ Евросойуус гааска наадыйыыта 2/3 төгүл кыыччыаҕа.
Кириэмилгэ биллэрбиттэринэн, Арассыыйаттан Евросойууска тиийэр ньиэп хааччахтаннаҕына, бүтүн кэнтиниэн эниэргийэлээх балаансын тутуһарга уларыйыылар киириэхтэрэ уонна бу барыта аан дойдутааҕы ньиэп ырыынагар улахан уларыйыыны тосхотуо. Маныаха, Дьобуруопаҕа Америка Холбоһуктаах Штаттарынааҕар быдан ыарахан буолуоҕа. Вице-премьер Александр Новаков этэринэн, Евросойуус Арассыыйа ньиэбиттэн аккаастаннаҕына, аан дойду үрдүнэн ньиэп сыаната биир баррель иһин $300 тиийиэ ыарыаҕа.
Москуба буоллаҕына, сааҥсыйалартан сылтаан муус устар 1 күнүттэн, эйэтэ суох судаарыстыбалары кытта гаас атыытын хантараагын солкуобайынан олохтуурга быһаарыммыта. Берлиҥҥэ ыйааҕы үөрэтиигэ сорук турбута, ол эрээри, кинилэр төлөбүрү евронан уонна дуолларынан олохтууру быдан суолталааҕынан аахпыттара.
Туһаныллыбыт РБК сигэтэ: https://www.rbc.ru/politics/04/04/2022/624b0e869a7947fed90b083b
