Киир

Киир

Алмаас хампаанньата Саха Өрөспүүбүлүкэтин Мииринэй оройуонугар социальнай инфраструктураны уонна куорат табыгастаах эйгэтин кэлимник сайыннарыыга уонна олох хаачыстыбатын үрдэтиигэ туһаайан, “АЛРОСА территорията” диэн куонкуруһу бэлиэр иккис төгүлүн ыытар. Ол түмүгэ   бу күннэргэ таҕыста.

4ttdw8ER4U

Бу сырыыга куонкуруска киирсэр баҕалаах оройуон уопсастыбаннай тэрилтэлэриттэн уонна муниципальнай тэриллиилэриттэн  уопсайа 20-тэн тахса сайаапка киирбит. Кинилэртэн куонкуруһу чиэстээхтик туораан, барыта холбоон 80 мөл. солк. тахса суумалаах тоҕус бырайыак үбүлэнэр буолла. Итинтэн, санатар буоллахха, бүтүн 50 мөл. солкуобайын “АЛРОСА” хампаанньа үбүлүүр. Итинтэн ордубут сууманы атын источниктартан киллэринэллэрин курдук былааннаммыта.

Кэрэхсэбиллээҕэ, “АЛРОСА территорията” куонкурус хас сыл аайы ыытыллыа дииллэр. Аан бастаан былырыын, 2021 сыллаахха, “Норуот көҕө” (“Народный актив) уопсастыбаннай хамсааһын быһаччы көҕүлээһининэн, олоххо киирбитэ.

Куонкурус түмүгүнэн кыайыылаахтарга үбү биэрии сыала-соруга дьэҥкэ – алмаастаах Мииринэй оройуонугар аныгы ирдэбилгэ эппиэттиир, олох хаачыстыбатын тупсарар гына, дьоҥҥо-сэргэҕэ табыгастаах уопсастыбаннас уонна култуура туонатын тэрийии.

Онуоха бу сыалга АЛРОСА үбүн уонна бүддьүөт үбүлээһинэ көрүллүөхтээҕэ быһаарыллыбыта.

Дьэ, быйыл кимнээх уонна ханнык бырайыактар бастыҥынан быһаарыллан, үбүнэн өйөнөр буолбуттарын билсиэҕиҥ.

Ол курдук, бу куонкурус түмүгүнэн, быйыл Удачнай куоракка медиа-киин уонна тиэргэннэр истэрин өрөмүөннүүр, тупсарар үлэ барар кыахтаммытын эттилэр. Оттон Светлэй уонна Арыылаах бөһүөлэктэригэр искибиэрдэрин тупсарыахтара. Айхал куоракка успуорт былаһаакката тутуллуо. Чернышевскай бөһүөлэгэр  медиа-устуудьуйа баар буолуоҕа.

Алмаастаах түөлбэ килбэйэр киинэ – Мииринэй куорат политехническай лиссиэйигэр элбэх хайысхалаах  аныгы үөрэх туонатын дьэндэтэн, саҥа тутууга эппиэттэһэр барыта саҥа оборудованиенан хааччыйыахтара.  Оттон Оҕо дыбарыаһыгар идэни таларга көмөлөөх аныгы интерактивнай саала тэриллиэ. Ону таһынан куораттан ырааҕа суох сиргэ стендэнэн ытыы комплексын тутуу былааннанар. Бу тутуулар бары, этиллибитин курдук, уопсастыбаннас көҕүлээһинин, туруорсуутун АЛРОСА өйүүр буолан, олоххо киирэр.

«Куорат  табыгастаах уонна аныгы эйгэтин тэрийии уонна Мииринэй оройуонун куораттарыгар уонна тыатын сирдэригэр үүнэр көлүөнэ араас өттүнэн сайдар усулуобуйатын тэрийии – АЛРОСА тулхадыйбакка тутуһар социальнай бэлиитикэтин инники күөҥҥэ турар хайысхаларыттан биирдэстэрэ. «АЛРОСА территорията» куонкурус оройуон уопсастыбаннаһын ирдэбилинэн тэриллибитэ. Биһиги бу күөн күрэс бэйэлэрэ араас бырайыактары торумнаан, судаарыстыбаннай эбэтэр муниципальнай бүддьүөттэртэн үп анатар, ону таһынан чааһынай инвестицияны булар көхтөөх уопсастыбаннай тэрилтэлэр биһиги улууска элбииллэригэр көмө, тирэх буолуоҕа диэн эрэнэбит», – диэн “АЛРОСА” хампаанньа генеральнай дириэктэрин солбуйааччы Алексей Дьячковскай санаатын үллэстэр.

Былырыыҥҥы куонкурус түмүгүнэн Мииринэй оройуонугар үөрэх, идэни талыы хайысхатыгар уонна оҕолорго уонна эрдэҕэс оҕолорго уйулҕа өттүнэн көмөлөөх сонун бырайыактар кыайан, үбүнэн өйөммүттэрэ. Мииринэй эрэгийиэннээҕи тэхиниичэскэй колледжын устудьуоннарыгар анаммыт мастарыскыай силигэ ситэн, тэрилинэн хааччыллыбыта. Оттон Светлэйгэ эрчиллэр сааланы тутуу бырайыага кыайбыта. Бэрт сотору бу бөһүөлэк олохтоохторун ырата туолаары сылдьар. Былырыын өссө Удачнай куорат киин болуоссатын тупсаран оҥорууга үп-харчы көрүллүбүтэ. Чернышевскайга дьон сатыы сылдьарыгар сөптөөх суол оҥоһуллубута, Айхалга куорат пааркатын тупсарбыттара.

Ол аата, алмаас хампаанньата “АЛРОСА территорията” диэн иккитэ – былырыын уонна быйыл – тэриллибит куонкуруһугар уопсайа 17 бырайыак кыайыылаах таҕыста.  Хампаанньа пресс-сулууспата иһитиннэрбитинэн, бу балары олоххо киллэрэргэ АЛРОСА уопсайа 95 мөл. солкуобайы үбүлээбит.

Бэйэ кэрр.

Тарҕат:

Санааҕын суруй

Бүтэһик сонуннар