Миша Николаев үөрэҕин бүтэрэн Эдьигээҥҥэ үлэлии сырыттаҕына, бу уол көхтөөх уонна дьоһуннаах эбит диэн хомсомуол үлэтин салайарыгар аныыллар.
Ол саҕана хайа да улууска райком хомуньуустарыгар бастыҥ бырааһынньыгынан Өктөөп өрөбөлүүссүйэтин күнүн далааһыннаахтык бэлиэтиир суруллубатах сокуон баара. Биһиги эмиэ сааспыт сөп түбэһэн, тыалы-кууһу билиммэккэ, уулусса устун күргүөмүнэн, былаах, хайҕал сурук тутуурдаах балай да хаампыт дьоммут, билэбит. Тойотторбут төһө да киинтэн кэлбит директиванан үлэлээтэллэр, бастыҥ хомуньуус аатын сүгэр төһүүлэрэ, дорҕоонноох тылы этэн баран, аһыы ууну тулуйарга күөнтэһэр көстүүлэрэ 90-с сыллар бүтүөхтэригэр диэри баара.
Эдэр уолаттар убайдарын үтүктэн аҕыйах буолан эмиэ мустубуттар. Дорҕоонноох тыллары саҥара илик уонна аһыы ууга үөрэнэ илик буоланнар, ол киэһэ кэпсэл-ипсэл, көр-күлүү аргыстаммыттар. Ол эрэн номохпут атыҥҥа.
Миша үлэлии сылдьан Еремеев диэн нуучча оҕонньоро ити бырааһынньык кэмигэр, муус тураатын кытта, өрүскэ киирэн илим үтэрин билбит. Ол оҕонньор аны илимин хайдах үппүтүн, төһө балыгы хаптарбытын кимиэхэ да кэпсээбэт эбит. Миша аһыы олорон уолаттарыгар этии киллэрэр: «Уолаттар, сарсын өрөбүл, муус турбут, дьиэҕэ таах сытыахтааҕар өрүскэ киирэн илимнэ үтүөххэйиҥ» диэбитин ылыммыттар. Кыдьымах быыһыгар ырааһыйалары булан, араас харахтаах илимнэрин сүүрүгү туора-уһаты үппүттэр. Сарсыныгар киирэн илимнэрин көрбүттэрэ, улахан харахтаах илимнэргэ биир эмэ улахан балык туппут, сороҕо кураанах үһү. Аны сүүрүгү уһаты үппүт кыра харахтаах илимнэригэр искэҕэ тохто сылдьар ряпушка (күндүөпкэ) балык хараҕын аахтара туппут. Бултуйбут дьон, үөрэн-көтөн дьиэлэригэр тахсан, кэпсэл-ипсэл бөҕө буолбуттар.
Сарсыныгар өрүскэ илим үтээччи балай да элбээбит. Онтон ыла Эдьигээннэр күһүн аайы кыдьымах быыһыгар баар ырааһыйаларга илим үтэр үгэстэммиттэр. Михаил Ефимович олохтообут үгэһин уонна Эдьигээннэр төрүт астарын өрө туталларын бэлиэтээн, биһиги үс сыл күндүөпкэ күрэһин түһүлгэтин хомуур хапсаҕайы кытта дьүөрэлээн тэрийэ сылдьыбыппытын дьон-сэргэ сөбүлээн хатылыыр этилэр. Эдьигээннэр өссө күһүн аайы төрүт астарын бырааһынньыгын тэрийэр үтүө үгэстээхтэр. Ол түһүлгэҕэ сылдьан, күндүөпкэттэн 42 көрүҥ аһылыгы оҥороллорун истэн турабын.
