Бүгүн, тохсунньу 16 күнүгэр, «Улуу арыйыылар аартыктарынан» (Пути Великих свершений) бырайыак иитинэн тэриллибит «Дьокуускай-Бодойбо» эспэдииссийэ пресс-кэмпириэнсийэтэ буолан ааста.
Тохсунньу 3 күнүгэр Дьокуускайтан 7 киһилээх бөлөх айаҥҥа туруммут. Айанньыттар 3 тыһыынча кэриҥэ килэмиэтирдээх Дьокуускай-Өлүөхүмэ-Маача-Перевоз-Бодойбо-Перевоз-Маача-Өлүөхүмэ-Дьокуускай маршрутунан тохсунньу 9 күнүгэр сырыыларын этэҥҥэ түмүктээбиттэр.
Пресс-кэмпириэнсийэҕэ “Улуу арыйыылар аартыктарынан” бырайыак салайааччыта Георгий Никонов, эспэдииссийэ начаалынньыга Афанасий Владимиров, СӨ Култууратын нэһилиэстибэтин эбийиэктэрин харыстыыр департамент салайааччыта Николай Макаров айан түмүктэрин кэпсээтилэр. Кинилэр кыраайы үөрэтээччилэри, устуоруктары, ыччаты, нэһилиэнньэни кытта кэпсэтэн, өйдөбүнньүк сирдэргэ, бибилэтиэкэлэргэ, түмэллэргэ, пааматынньыктарга сылдьыбыттар. Эспэдииссийэ сүрүн сыалынан-соругунан, саха диаспоратын өрөспүүбүлүкэ тас өттүгэр үөрэтии, ол иһигэр Өксөкүлээх Өлөксөй олоҕун кэрдиис кэмнэрин, саха суруйааччыларын уонна саха сыылынайдарын дьылҕаларын туһунан чахчылары көрдөөһүн буоларын бэлиэтээтилэр.
“Эспэдииссийэбит Улуу Кыайыы 80 сылыгар анаммыт буолан, сылдьыбыт бары нэһилиэктэрбитигэр – Өлүөхүмэ, Маача, Перевоз, Бодойбо – Кыайыыга аналлаах пааматынньыктарыгар вено, сибэкки уурбуппут. Айаммыт биир сүрүн соругунан, Саха сирин уонна Иркутскай уобалас Аҕа дойду Улуу сэриитигэр кыайыыга кылааттарын үөрэтии, чинчийии буолар,”- диэн Георгий Никонов иһитиннэрдэ.
«Түмэллэргэ Саха сирин артефактара, бэлиэлэрэ (следы) бааллар. Итилэр ортолоругар Вера Дмитриевна Давыдова - Саха бастакы дьахтар-суруйааччыта. Кини дьылҕатын туһунан матырыйааллары булан көрдүбүт. Бодойбо куоракка олорор бэйэбит бэрэстэбиитэллэрбит биһигини сылаастык көрсүбүттэригэр, улахан махталбытын тиэрдэбит. Маны таһынан, Алексей Елисеевич Кулаковскай туһунан информацияны көрдөөтүбүт да, хомойуох иһин, тустаах матырыйааллар көстүбэтилэр. Бу боппуруоһу кэлин өссө чинчийэр санаалаахпыт,» - диэн Николай Макаров эттэ.
Тэрээһин бүтүүтэ Георгий Никонов иһитиннэрбитинэн, эспэдииссийэлэр тустарынан тэлэбиидэнньэҕэ биэрии, документальнай киинэ, суол бэлиэтээһиннэрин (путевые заметки) уонна уочаркалары таһаарар баҕалаахтарын эттэ. Маны таһынан, Өлүөхүмэ уонна Бодойбо бииргэ үлэлэһиигэ дуогабар бэлэмнээн илии баттаһыахтаахтар.
Татьяна Жанчикова.
