Бүгүн, олунньу 24 күнүгэр, «Бойобуой Кыһыл знамя уордьанын» СССР Ис дьыала миниистирин, аармыйа генералын Щелоков илиититтэн ылбыт чулуу силиэдэбэтэл Ариан Игнатьев дьоруойдуу быһыыны оҥорбута биэс уон сыла буолла. Бу бэлиэ күнүнэн Емельян Ярославскай аатынан Хоту сир норуоттарын устуоруйатын уонна култууратын түмэлигэр Ариан Ивановичка аналлаах быыстапка аһыллыаҕа. Онон, номоххо киирбит дьоруойдуу быһыыны кылгастык сэгэтэн көрүөҕүҥ.
1973 сыллаахха Сунтаар Бордоҥуттан төрүттээх Ариан Игнатьев, СССР ИДьМ Волгоградтааҕы Милииссийэ силиэстийэҕэ үрдүкү оскуолатын бүтэрэн баран, Алдаҥҥа, онтон 1974 сыллаахха Чульмаҥҥа силиэдэбэтэлинэн анаммыта. Кини үлэтин маҥнайгы күнүттэн үрдүк сиэрдээх-майгылаах, мындыр, хорсун киһи буоларын көрдөрбүтэ. Оттон 1975 сыл олунньу 24 күнүгэр Ариан Иванович ыар буруйу оҥорон баран куотан иһэр сэбилэниилээх бөлөҕү тохтоппута.
Улахан буруйу оҥоруу буолбутун кэннэ милииссийэ үлэһиттэрэ суолга бандьыыттары тоһуйа тахсыбыттара. Ариан Иванович элбэх массыына быыһыгар олус дьиибэтик айаннаан иһэр суһал көмө массыынатын уорбалыы көрбүтэ уонна тохтоторго санаммыта. Массыына тохтообокко көтүтэ турбутугар бандьыыттар буолалларын чопчу билбитэ уонна суоппарын кытта эккирэтэн барбыта. Бандьыыттар кинини аптамаатынан санныгар табан бааһырдыбыттара, онуоха кини массыыналарын табан сатыы куотарга күһэйбитэ. Ол кэннэ, хаана барарын аахсыбакка, сүүрэн иһэр бандьыыттарга утары тахсан, хаарга сытан ытыалаан тохтоторго санаммыта. Дьолго, рациянан биллэрбитин кэннэ, милииссийэ үлэһиттэрэ кэлэн биэрбиттэрэ. Бандьыыттар бэринэргэ эрэ тиийбиттэрэ. Ариан Иванович суоппарыныын элбэх хааны сүтэрэннэр балыыһаҕа киирбиттэрэ. Кини салгыы Москубаҕа госпиталга эмтэнэ барбыта. Манна сытан «Известия» хаһыаттан үрдүк наҕараадаҕа тиксибитин билбитэ.
Ити курдук Ариан Игнатьев ис дьыала уорганнарыгар силиэдэбэтэлинэн Алдаҥҥа, Чульмаҥҥа, Аллайыахаҕа, Сунтаарга барыта 26 сыл эҥкилэ суох үлэлээбитэ. Саамай уустук 1990-2007 сылларга силиэстийэлиир отдел салайааччытынан, ыстаарсай борокуруорунан үлэлээбитэ. Кини хайа да түгэҥҥэ туохтааҕар да кырдьыгы, сиэрдээх буолууну, киһилии сыһыаны өрө тутара. Тапталлаах кэргэн, амарах аҕа, эйэҕэс эһэ, ыарахан ыарыыттан эрдэ быстыбатаҕа буоллар, кулун тутар 1 күнүгэр 79 сааһын туолуохтаах этэ.
Бэлэмнээтэ КҮНДЭЛИ.
