«Литература уонна киинэ» Норуоттар икки ардыларынааҕы киинэ бэстибээлэ – литературнай айымньыга олоҕуран уһуллубут хартыыналары көрдөрөр соҕотох бэстибээл.
Киинэ бэстибээлэ балаҕаны ыйын 16 күнүттэн 19-р диэри Ленинградскай уобаласка Гатчинаҕа ыытыллар. Манна Саха сириттэн хас даҕаны киинэни көрдөрүөхтэрэ диэн СӨ Ил Дарханын уонна Бырабыыталыстыбатын пресс-сулууспата иһитиннэрэр.
Куонкуруһа суох бырагыраама чэрчитинэн Саха сириттэн 4 киинэни көрдөрүөхтэрэ:
«Мин үрдүбэр күн хаһан даҕаны киирбэт», режиссер Любовь Борисова.
«Тойон Кыыл», режиссер Эдуард Новиков.
«Сайсары күөлгэ…», режиссер Костас Марсан.
«Тыгын Дархан», режиссер Никита Аржаков.
Маны таһынан, балаҕан ыйын 16 күнүгэр Санкт Петербург куоракка «Билии Дойдута» («Мир знаний») киинэ бэстибээлигэр «Орто Дойду» киинэни көрдөрүөхтэрэ. Бу хартыына 1993 сыллаахха уһуллубута, режиссер -Алексей Романов. «Орто Дойду» саха кинематографиятын устуоруйатыгар аан маҥнайгы толору метражтаах киинэнэн буолар.
Манна оонньуу быһыытынан сахалыы сиэри-туому, үгэстэри, саха итэҕэлин уонна саха төрүт олоҕун-дьаһаҕын көрдөрөллөр. Быйыл, 2022 сыллаахха, «Сахафильм» устуудьуйа бу урукку хартыынаны тупсаран, реставрациялаан биэрбитэ.
«Билигин саха киинэтэ – номнуо феномен буолбатах, бу аан дойдутааҕы уонна Арассыыйатааҕы таһым чахчыта. Саха кинематограба биһиги өрөспүүбүлүкэбит визитнэй карточкатынан буолуоҕа диэн эрэнэбин. Биһиги инникитин даҕаны саха киинэтин өйүөхпүт», - диэн эрдэ СӨ Ил Дархана Айсен Николаев бэлиэтээн турардаах.
Санатар буоллахха, Ил Дархан дьаһайыытынан, быйыл саха киинэтин индустрията судаарыстыбаннай өйөбүллээх буолуутун туһунан уураах тахсыбыта.
