Киир

Киир

Саха АССР төрүттэммитэ 100 сылын уонна Саха Өрөспүүбүлүкэтин Судаарыстыбаннаһын күнүн чэрчитинэн, култуура тэрилтэлэрэ эгэлгэ култуурунай тэрээһиннэри бэлэмнээбиттэр. СӨ Култуураҕа уонна духуобунай сайдыыга миниистирэ Владислав Левочкин иһитиннэрбитинэн, тэрээһиннэр балаҕан ыйын 22 күнүттэн алтынньы 10 күнүгэр диэри ыытыллыахтара.

- Саарбаҕа суох, Саха АССР төрүттэммитэ 100 сылын чэрчитинэн ыытыллар бырааһынньыктааҕы тэрээһиннэртэн биир сүрүннэрэ – Арассыыйа Улахан тыйаатырын гостуруола. Дьокуускайга балет солистара уонна оркестр кэрэхсэбиллээх бырагыраамманы көрдөрүөхтэрэ. Дьокуускай куорат олохтоохторугар анаан биир соһуччу түгэнинэн Норуоттар икки ардыларынааҕы «Дьүкээбил» (Северное сияние) XII Арктикатааҕы музыкальнай бэстибээл чэрчитинэн Игорь Бутман квинтетын кэнсиэрэ буолуоҕа. Кэнсиэр балаҕан ыйын 27 күнүгэр Опера уонна балет тыйаатырыгар ыытыллыаҕа. Маны таһынан, Орджоникидзе болуоссатыгар «Сайдар Сахам сирэ» бырааһынньыктааҕы бырагыраама буолуоҕа. Оттон Саха Циркэтэ «Парад Алле» туруорууну көрдөрүөҕэ, «Арассыыйа – мин устуоруйам» «Биһиги Сахабыт сирэ» квиз-оонньууну ыытыаҕа, «Симэх» национальнай киин «Саха сирин геральдиката» диэн быыстапканы арыйыаҕа», - диэн Владислав Левочкин бэлиэтээн этэр.

Ол курдук, балаҕан ыйын 22 күнүттэн алтынньы 10 күнүгэр диэри, «Симэх» норуодунай прикладной ускуустуба уонна уус-уран үлэлэр Национальнай кииннэрэ «Саха сирин геральдиката» диэн ураты гражданскй-патриотическай быыстапкаҕа ыҥырар.

Балаҕан ыйын 27 күнүгэр, Марфа уонна Сергей Расторгуевтар ааттарынан СӨ Судаарыстыбаннай Цииркэтэ күнүс 14.00 чаастан цирк искибиэригэр «Парад алле» диэн цирковой туруоруулаах бырааһынньыктааҕы маассабай күүлэйи ыытар.

Маны таһынан, балаҕан ыйын 27 күнүгэр, «Дьүкээбил» (Северное сияние) XII Арктикатааҕы музыкальнай бэстибээл чэрчитинэн, Опера уонна балет тыйаатырыгар аатырбыт джазмен, Арассыыйа норуодунай артыыһа, саксофонист Игорь Бутман квинтетын кэнсиэрэ буолуоҕа.

Балаҕан ыйын 28 күнүгэр, «Арассыыйа – мин устуоруйам» устуоруйа пааркатыгар «Биһиги Сахабыт сирэ» квиз-оонньуу ыытыллыаҕа. Оонньууга Дьокуускай куораттааҕы үөрэх кыһаларын устудьуоннара кыттыахтара.

Маны сэргэ, бу күннэргэ «Саха» НКИХ Саха Өрөспүүбүлүкэтин биллиилээх бэлиитичэскэй диэйэтэллэрин дьылҕаларын арыйар уонна устуоруйа чахчыларын кэпсиир документальнай киинэлэри көрдөрүөхтэрэ.

Саха Өрөспүүбүлүкэтин судаарыстыбаннаһын түмэллэригэр, Нам улууһун Хатырык нэһилиэгэр, Үөһээ Бүлүү улууһун Харбалаах сэлиэнньэтигэр, Таатта улууһун Чөркөөҕөр уонна Бүлүү куоракка аһаҕас ааннар күннэрэ ыытыллыахтара.

Тарҕат:

Санааҕын суруй

Бүтэһик сонуннар