Сэтинньи 11 күнүгэр Саха тыйаатырыгар Бүтүн Арассыыйатааҕы «Белая трость» аахсыйа чэрчитинэн Тимофей Сметанин пьесатынан туруоруллубут «Лоокуут уонна Ньургуһун» испэктээги көрдөрдө. Туруорууну мөлтөхтүк көрөр уонна көрбөт дьоҥҥо анаан бастакытын сахалыы тифлокомментарийынан хааччыйдылар.
Тиффлокомментарий – уопсастыбаннай миэстэҕэ туох буола турарын көрбөттөргө анаан тылынан ойуулааһын. Аан дойдуга киэҥник туттуллар ньыма.
Быйыл саас Саха тыйаатыра уонна Өрөспүүбүлүкэтээҕи көрбөттөр бибилэтиэкэлэрэ саҥа социальнай өҥөнү – тифлокомментарийынан хааччыйыыны олоххо киллэриигэ сөбүлэҥ түһэрсибиттэрэ. Ол быһыытынан, мөлтөх харахтаах эбэтэр көрбөт көрөөччүгэ испэктээккэ туох буола турарын: сценаҕа артыыстар хайааһыннарын, көстүүмнэрин, ис туруктарын уларыйыытын, декорациялар уонна реквизиттэр солбуһууларын тылынан ойуулаан бэриллиэхтээх.
«Тыйаатырбыт бу ньыманы бастакытын тутунна. Национальнай өрөспүүбүлүкэлэргэ тыйаатыр туруоруутун тифлокомментарийынан Татарстаҥҥа эрэ хааччыйаллар. Онно биһиги эбиллэн биэриэхпит. Бүгүҥҥү туруорууга 50-тан тахса хараҕынан мөлтөхтүк көрөр уонна көрбөт дьон кэллилэр, барыларыгар истэр тэрил биэрдибит», – диэн Өрөспүүбүлүкэтээҕи көрбөттөр бибилэтиэкэлэрин мэтиэдикэҕэ салаатын сэбиэдиссэйэ, тифлокомментатор Евдокия Герасимова кэпсээтэ.
«Лоокуут уонна Ньургуһун» испэктээги бибилэтиэкэ ааҕааччылара бэйэлэрэ талбыттар. Бырайыагы көҕүлээччилэр кэлэр сылга грант өйөбүлүнэн өссө хас даҕаны испэктээги тифлокомментарийынан хааччыйыахпыт диэн эрэнэллэр. Бу көрбөт дьоҥҥо элбэх үөрүүнү, дуоһуйууну аҕалыахтаах.
Сонун төрдө: П.А.Ойуунускай аатынан Саха академическай тыйаатырын пресс-сулууспата
