С.А. Новгородов аатынан «Айар» национальнай кыһа уонна «Күрүлгэн» уус-уран сурунаал эрэдээксийэтин тэрийиилэринэн, СӨ национальнай бибилэтиэкэтин өйөбүлүнэн тохсунньу 27 күнүттэн олунньу 18 күнүгэр диэри ыытыллыбыт күрэх түмүктэннэ.
Барыта 13 суруйуу киирдэ: Дьокуускайтан, Амматтан, Дьааҥыттан, Кэбээйиттэн, Сунтаартан, Томпоттон. Үөрэх-билим үлэһиттэрэ, суруйааччылар уо.д.а. идэлээх дьон кыттыбыттар.
Үлэлэри «Айар» үлэһиттэрэ дьүүллээтилэр: Ольга Андреевна Фролова-Янцен – уус-уран эрэдээксийэ сэбиэдиссэйэ, Айсена Сергеевна Тимофеева – тас эйгэҕэ туһуламмыт салаа салайар эрэдээктэрэ, Екатерина Дмитриевна Сивцева – уус-уран литература эрэдээктэрэ.
Түмүк: I – Светлана Егорова-Тулуйхаана (Дьокуускай), «Эмиэ биир хоһоон...» (былырыын кыттан үһүс буолбута, бу сырыыга Римма Корякина-Хотууна «Айыы арчыта-2022» күрэххэ бастаабыт «Үрдүк дьол!» диэн «Күрүлгэҥҥэ» бэчээттэммит хоһоонун ырыппыт, анаарбыт); II – Светлана Винокурова (Томпо), «“Уйгур” уйгуурдубут санаалара» (Наталья Михалёва-Сайа «Айарга» тахсыбыт кинигэтигэр киирбит айымньылары анаарыы); III – Галина Стручкова-Табайаана (Дьааҥы), «Атыннар» (Римма Корякина-Хотууна «Күрүлгэҥҥэ» бэчээттэммит кэпсээнин анаарыы).
Дьүүллээччилэр суруйбут дьон ааттара ыйыллыбатах үлэлэрин көрөн түмүктэрин таһаардылар.
Бары кыттааччыларга туоһу сурук ыытыллыаҕа. Бастыҥ уонна талыллыбыт үлэлэр «Күрүлгэн» сурунаалга уонна «Кыым» хаһыат «Кулуһун» уус-уран сыһыарыытыгар бэчээттэниэхтэрэ. Бастыҥнарга, бэйэлэригэр биллэриллэн, тустаах туоһубуллар, биһирэбиллэр туттарыллыахтара. Ону сэргэ, Мария Данилова-Күн Мичээрин «Көйгө кыыс» кэпсээнигэр санаатын суруйбут ХИФУ устудьуона Диана Васильеваҕа «Күрүлгэн» сурунаал биһирэбилэ ананна.
Тэрийээччилэр.
