Кулун тутар 3 күнүгэр Саха Өрөспүүбүлүкэтин Национальнай бибилэтиэкэтигэр “Сахалыы дьыктаан” кыайыылаахтарын быһаардылар. Национальнай бибилэтиэкэҕэ дьыктааны кэлэн суруйбут дьон түмүктэрин биллилэр, наҕараада, туоһу сурук туттулар.
Ол курдук быйыл түөрт киһи дьыктааны “туйгун” сыанаҕа суруйбут, аҕыс киһи - “үчүгэй” сыанаҕа. Тэрийээччилэр этэллэринэн, түөрт сыанаҕа суруйбуттар сурук бэлиэтигэр эрэ кыра сыыһалаахтар эбит. Быһа холоон, бары даҕаны олус үчүгэйдик суруйбуттара бэлиэтэннэ.
Быйылгы дьыктаан тиэкиһэ Гавриил Баишев-Алтан Сарын «Киэһээ айан» диэн айымньытыттан быһа тардыы буолла, өрөспүүбүлүкэ үрдүнэн бары бу тиэкиһи суруйдулар. Маныаха дьыктаан уустуга диэн Алтан Сарын бэйэтэ хайдах саҥарарынан суруйбута буолар. Уһуйааччылар тиэкис хайдах баарынан ааҕан, оннук бэрэбиэркэлээтилэр.
Кыайыылаахтарга Хотугулуу-Илиҥҥи норуоттар тылларын уонна култуураларын үнүстүүтүн саха тылын хаапыдырата, Гуманитарнай чинчийии уонна аҕыйах ахсааннаах хотугу омуктар кыһалҕаларын үнүстүүтэ, “Ситим” медиа бөлөх бириис туттардылар.
Ол курдук Таатта улууһун математика учуутала София Кондратьеваҕа, Виктория Харабаеваҕа, “Якутия” технопарк үлэһитэ, химик, юрист идэлээх Нюргуяна Михалеваҕа, химия учуутала Ия Кычкинаҕа, оҕо уһуйаанын иитээччитэ Анастасия Васильеваҕа, Мария Нефедоваҕа, Василена Шаринаҕа, Мэдиссиинэ национальнай киинин социальнай үлэһитэ Зинаида Егороваҕа, уруһуй уонна черчение учуутала Нина Наумоваҕа, СӨ дьарыктаах буолуу судаарыстыбаннай кэмитиэтин үлэһитэ, юрист идэлээх Петр Петровка уонна Степанида Архиповаҕа добун суруктары туттардылар.
Ити курдук араас идэлээх дьон төрөөбүт төрүт тылларын бэркэ билэллэрин көрдөрдүлэр. Бу дьон үксүлэрэ сыл аайы кэлэн дьыктааҥҥа кытталларын эттилэр.
“Ситим” медиа бөлөх салайааччыта Владимир Степанов саамай үчүгэй буочардаах кыттааччыга Ия Кычкинаҕа – Алтан Сарын аймаҕар анал бирииһин туттарда.
Хотугулуу-Илиҥҥи норуоттар тылларын уонна култуураларын үнүстүүтүн саха тылын хаапыдыратын сэбиэдиссэйэ, тыл билимин хандьыдаата Дария Ивановна Чиркоева:
- 2014 сылтан бу дьыктааны ыытабыт. Сыл аайы тэрээһиммитигэр куруук элбэх киһи кэлэн кыттарыттан үөрэбит, онон кинилэргэ махталбытын тиэрдэбит.
Дьыктааны суруйуу эмиэ уратылардаах. Манна аҥардас тиэкиһи эрэ суруйуу өттүнэн буолбатах, билии-көрүү эмиэ наада. Ону таһынан эһиги, кыттааччылар, тыл патриоттара буоларгытын дакаастаан, үлэбитин өйөөн, өйдөөн кэлэҕит диэн сыаналыыбын.
Сахалыы дьыктааны устудьуоннарга туспа ыытабыт. Кинилэргэ эмиэ Алтан Сарын туһунан ахтан, кэпсээн ааспыппыт. Устудьуоннар Алтан Сарын таҥаһын-сабын, хаартыскаҕа хайдах туттан-хаптан олорорун көрөн сөҕөллөр. Оттон саха тылыгар анаан-минээн үөрэнэр устудьуоннарга кини тылга туох оруоллааҕын, суолталааҕын, биллэн турар, кэпсиибит буоллаҕа.
Быйылгы дьыктааҥҥа “Киэһээ айан” диэн Алтан Сарын айымньытыттан быһа тардан аахтыбыт. Манна тиэкискэ да, сурук да бэлиэтигэр улахан уустук суоҕа. Ол эрээри быйылгы тиэкискэ кини хайдах саҥарарынан суруйбутун истэн суруйарга уустуктар бааллара буолуо. Бу манна баар тыллары билиҥҥи көннөрү кэпсэтии да тылыгар булбаккын. Быйыл 12 киһини бэлиэтээтибит. Олортон түөрт киһи бастыҥнык суруйда - ол аата алҕаһа суох суруйбуттар, сурук бэлиэтигэр биир-икки сыыһалаахтар. Сурук бэлиэтин араастаан көрөбүт, уустук-судургу диэн араартыыбыт. Тыл эрэ үөрэхтээҕэ билиэн сөптөөх сурук бэлиэлэрэ эмиэ баар буолуохтарын сөп. Аҕыс үчүгэй суруксуту бэлиэтээтибит. Тылы суруйууга ким даҕаны алҕаһы түһэрбэтэх. Эһиилги дьыктааҥҥа эмиэ көхтөөхтүк кыттаргытыгар ыҥырабыт.
СӨ Национальнай бибилэтиэкэтин медиакиинэ
