Саха сиригэр улуу тириэньэр Дмитрий Коркин иитэн таһаарбыт аатырбыт тустууктара Роман Дмитриев, ПавелПинигин, Александр Иванов 1976 сыллааҕы XXI олимпийскай оонньууларга кыайыыларын туһунан уус-уран киинэ уһулан саҕалаатылар.
Ил Дархан Айсен Николаев уһулар хамаанданы уонна артыыстары кытта көрүстэ. Кини саха киинэтэ сайдан иһиэхтээҕин, бу киинэ саха успуордун устуоруйатын биир саамай чаҕылхай түгэнин толору көрдөрөр уонна үйэтитэр соруктааҕын эттэ.
1976 сыллаахха Канада Монреаль куоратыгар ыытыллыбыт XXI олимпийскай оонньууларга көҥүл тустууга Павел Пинигин олимпийскай чөмпүйүөн, оттон XX олимпийскай оонньуулар чөмпүйүөннэрэ Роман Дмитриев уонна Александр Иванов үрүҥ көмүс призер буолбуттара.
Режиссер Михаил Лукачевскай киинэ олус умсугутуулаах буолуо диэн эрэннэрдэ: «Аан дойду таһымыгар эппиэтиир киинэни уһулуохтаахпыт. Ол туһугар биһиги сыл аҥаарын быһа тэриннибит. Көстүүмнэри бэлэмнээтибит, пластическай гримы бастакытын туһанныбыт. Артыыстары тустууга дьарыктаатылар. Бырайыакка барыта сүүстэн тахса киһилээх хамаанда үлэлии сылдьар. Сыл бүтүүтэ улахан экраҥҥа таһааран, аан дойдуга көрдөрөргө кыһаллыахпыт», – диэн кини кэпсээтэ.
Киинэҕэ Саха сирин устуоруйатыгар аан бастакытын компьютернай графика көмөтүнэн 1976 сыыллааҕы Монреаль «Гранд» стадионун оҥоруохтара. Анал эппиэктэрдээх уһулууларга бастыҥ тэрили туһаныахтара. Киинэ режиссера – Михаил Лукачевский, сценарий ааптара — Алексей Амбросьев. Дмитрий Коркин оруолун Саха сирин үтүөлээх артыыһа Иннокентий Луковцев, Павел Пинигини – Гаврил Менкяров, Роман Дмитриевы – Семен Лукин, Александр Иванову – Дьулусхан Андросов толоруохтара.
Сонун төрдө: СӨ бырабыыталыстыбатын уонна Ил Дарханын пресс-сулууспата
