Киир

Киир

Бэс ыйын 20 күнүгэр СӨ норуодунай суруйааччыта Сэмэн Уруукап төрөөбүтэ 95 сылыгар анаммыт дьээбэлээх-оонньуулаах хоһоон-кэпсээн сабыылаах күрэҕин түмүк тэрээһинэ Дьокуускай куорат Н.Д. Неустроев аатынан бибилэтиэкэтигэр буолла.

Күрэххэ барыта 29 хоһоон, 31 кэпсээн киирэн көрүлүннэ. Дьокуускайтан, итиэннэ 13 улуустан киирбиттэр: Амма, Бүлүү, Горнай, Дьааҥы, Кэбээйи, Мэҥэ Хаҥалас, Нам, Ньурба, Олоохуна, Сунтаар, Таатта, Уус-Алдан, Үөһээ Бүлүү.

Хоһоон дьүүлүгэр үлэлээтилэр: Иван Николаев-Уххан – суруналыыс, суруйааччы, Мария Решетникова-Арылы Дуйдаах – суруйааччы, филология магистра, Матрёна Попова – ХИФУ ХИНТуоКИ саха литературатын кафедратын доцена, филология кандидата.

Кэпсээҥҥэ: Айталина Никифорова-Шадрина – суруналыыс, суруйааччы, Прасковья Байанаева – суруйааччы, педагог, лингвистика магистра, Данил Макеев – суруйааччы, «Чолбон» сурунаал солбуйааччы эрэдээктэрэ.

Дьүүл сүбэтин түсчүтэ – Валерий Руфов, норуодунай суруйааччы улахан уола.

Күрэх дьаһабыла – Афанасий Гуринов-Арчылан, «Күрүлгэн» сурунаал эрэдээктэрэ.

Тэрийээччилэр: СӨ норуодунай суруйааччыта Семён Титович Руфов-Сэмэн Уруукап уонна кини кэргэнэ Арассыыйа үөрэҕин туйгуна, СӨ үөрэҕин үтүөлээх үлэһитэ Мария Спиридоновна Арбыкина ааттарын үйэтитии пуондата, Үөһээ Бүлүү улууһун Тамалакаан нэһилиэгин дьаһалтата, «Кыым» хаһыат уонна «Күрүлгэн» сурунаал эрэдээксийэлэрэ.

dobunsuruk2

ТҮМҮК МАННЫК БУОЛЛА:

Хоһоон. I – «Дьээбэтинньик-пааматынньык» (кырыытынан кырыыламмыт хоһоон). Дьөгүөр Бөтүрүөп (Дьокуускай к.). II – «Оо, дьэ...» (эпиграммалар). Светлана Егорова-Тулуйхаана (Дьокуускай к.). III – «Тыраахтар уонна тырахтарыыс». Иннокентий Васильев-Тэгэ (Бүлүү улууһа, I Күүлэт).

Кэпсээн. I – «Маҥырыан мунньах». Александр Филиппов-Бири (Олоохуна, I Нөөрүктээйи), II – «Гастарбайтердар». Вилюрия Сергучёва (Сунтаар, Куокуну), III – «Хаспадьыыннар». Сергей Иванов (Бүлүү).

Кыайыылаахтарга туоһуну, бириэмийэни, биһирэбили пуонда салайааччыта Максим Семёнович Руфов туттарда. Күрэҕи өйөөбүт «Көмүөл» кыһа салайааччыта, суруналыыс, суруйааччы Борис Павлов тэрээһиҥҥэ кыттыыны ылла, бэйэтин эҕэрдэтин эттэ. Ол кэнниттэн санаа үллэстиитэ бэрт көхтөөхтүк барда. Күрэх аны да салҕана турдун диэн баҕа санаа этилиннэ.

Афанасий Гуринов-Арчылан, «Күрүлгэн» сурунаал эрэдээктэрэ.

Санааҕын суруй

Бүтэһик сонуннар