Бары билэргит курдук, сотору хас да көлүөнэ сүрэҕэр уостубат төлөнү умаппыт Хомсомуол 105 сыла бэлиэтэнэр. «Кыым» норуот хаһыата быйылгы уочараттаах «Саныаҕыҥ, доҕоттор, ааспыты!» кэнсиэрин бу бэлиэ күҥҥэ уонна «Ситим» медиа-бөлөх 20 сылыгар анаан тэрийэр.
Күндү бар дьоммутун сэтинньи 9 күнүгэр киэһэ 17.00 чаастан Дьокуускай к. «Сэргэлээх уоттара» култуура киинигэр буолар дьоро түһүлгэбитигэр кэлэн, сырдык-ыраас ыралаах, үлэни, кырдьыгы, эйэни өрө туппут хомсомуол саҕанааҕы ырыалары истэн, астына-дуоһуйа сынньанан бараргытыгар ыҥырабыт!
Кэнсиэри талааннаах салайааччы, режиссер Алексей Константинов туруоруо, бары сөбүлүүр суруналыыспыт Эдуард Рудых ыытыа. Оччотооҕу кэм умнуллубат ырыаларын сахабыт эстрадатын бастыҥ ырыаһыттара, Госфилармония артыыстара, «Туймаада» ансаамбыл эр дьоно уонна да атыттар толоруохтара.
Былырыын «Сэргэлээх уоттара» култуура киинигэр икки кэнсиэр буолбут буоллаҕына, быйыл биир эрэ кэнсиэр буоларын бэлиэтиибит. Санатан эттэххэ, Кыым хаһыат тэрийэр кэнсиэртэрэ мэлдьи толору саалалаах ааһааччылар. Үгүс көрөөччү кэнсиэрпитин көтүппэккэ сылдьар буолан, быйыл даҕаны оннук ааһыа диэн эрэллээхпит. Онон, билиэккитин эрдэттэн ылынаргыт ордук буолуо диэн сүбэлиибит.
Билиэттэр Былатыан Ойуунскай аатынан Саха тыйаатырын, «Сэргэлээх уоттара» култуура киинин каассаларыгар, Бэчээт дьиэтин 111-с хоһугар (Орджоникидзе уул., 31-с дьиэтэ), “Кыым” хаһыат эрэдээксийэтигэр (Киров уул., 18-с дьиэтэ В блок,709 хос) атыыланаллар.
Маны сэргэ билиэттэри +7 (924) 367-01-56 уонна +7 (999) 174-58-45 нүөмэрдэргэ эрийэн мобильнай баан нөҥүө атыылаһан ылыаххытын сөп.
Тэрийэр бөлөх.
