Алтынньы 28 күнүгэр киэһэ 17:00 чаастан СӨ Үүнэр көлүөнэтин судаарыстыбаннай тыйаатыра Моэм Сомерсет айымньыларынан «Кубулунууттан кырдьыкка эбэтэр төттөрү» диэн моно-испэктээги көрдөрүөҕэ. Туруоруу СӨ үтүөлээх артыыһа Мария Данилова айар үлэтин 35 үбүлүөйдээх сылыгар анаммыт декаданы түмүктүөҕэ.
Моно-испэктээк дьахтар ис туругун, кутун-сүрүн айманыытын тиэрдэр, сүрэҕэ тугу кэпсиирин арыйар ураты иэйиилээх, үгэргиир эбэтэр ханалытан этэр чараас уобарастаах буолбут.
Моэм Сомерсет хас биирдии айымньытыгар киһи уйулҕатын, айылгытын өтө көрөр психолог быһыытынан көстүбүт. Кини ойуулуур дьүһүйүүтэ ардыгар сарказм буолар, сороҕор олох даҕаны өс санааҕа кубулуйар. Ол эрээри киһи манна хадаар уонна толоос сыһыаны көрбөт.
Сүрүн дьоруой бэйэтин олоҕун-дьаһаҕын, санаатын, имэҥин уонна күөрчэхтии ытыллар күүстээх иэйиитин арыйар. Туруоруу таптал, эр киһи уонна дьахтар сыһыаннарын туһунан тиэмэни таарыйар, көрөөччүнү долгутар курус түгэннэри сэһэргиир.
Моно-испэктээк ис хоһоонун тиэрдиигэ сүрүн дьоруой көстүүмнэрэ, декорация, дьоһун муусука уонна бэртээхэй уот-күөс көмө буолуохтара. Режиссер уонна туруорааччы худуоһунньук — СӨ култууратын туйгуна, Үүнэр көлүөнэ тыйаатырын сүрүн худуоһунньуга Прасковья Павлова.
Сүрүн оруолу толорооччу — СӨ үтүөлээх артыыһа Мария Данилова.
Сонун төрдө: СӨ Үүнэр көлүөнэтин тыйаатыра
