Олунньу 4 күнүгэр СӨ Үүнэр көлүөнэтин судаарыстыбаннай тыйаатырыгар Арассыыйаҕа Дьиэ кэргэн сылын, Саха сиригэр Оҕо саас сылын, Култуура тэрилтэлэригэр оҕо тыйаатырга айар дьоҕурун сайыннарыы сылын чэрчитинэн, оҕону тыйаатырга уһуйар устуудьуйаҕа кастинг буолла.
Тыйаатыр салайааччылара, Арассыыйа култууратын үтүөлээх үлэһиттэрэ Матрена, Алексей Павловтар саҥа арыллар "Тулалыыр эйгэбэр аһаҕаспын, бэйэбэр арыллабын..." устуудьуйа салайааччыта, СӨ үтүөлээх артыыһа Мария Данилова, уһуйааччылар, СӨ үтүөлээх артыыстара Анна Флегонтова, Марина Корнилова уонна СӨ култууратын туйгуна, Үүнэр көлүөнэ тыйаатырын сүрүн худуоһунньуга уонна режиссера Прасковья Павлова оҕолору уонна төрөппүттэри кытта аһаҕас кэпсэтии быһыытынан сүүмэрдээһин ыыттылар. Кинилэр оҕолор сахалыы саҥарар, ааҕар уонна кэпсиир дьоҕурдарыгар болҕомтолорун уурдулар.
Сүүмэрдээһиҥҥэ Дьокуускай куорат оскуолаларын сахалыы саҥарар 1-11 кылаас үөрэнээччилэрэ кытыннылар. Кинилэр үрдүк сыанаҕа, киинэҕэ көрөр артыыстарын кытта биир хоско олороллоруттан олус долгуйдулар уонна үөрдүлэр. Устуудьуйаҕа талыллыбыт оҕолор үөрүүлэрин көрөн, тыйаатыр артыыстара сэргэхсийэн, тэҥҥэ үлэлэһэр, айар-тутар санаалара эбии бөҕөргөөтө.
Артыыс дьоҕурун арыйар устуудьуйа оҕолору тыйаатыр умсугутуулаах эйгэтигэр киллэриэ, артыыс сатабылын кистэлэҥнэрин үөрэтиэ, саҥарар-иҥэрэр ускуустубаны баһылыырга уһуйуо, сыанаттан куттаммат буоларга эрчийиэ, оҕо ис кыаҕын арыйар сыаллаах-соруктаах үлэлиэ. Оҕолор, оскуолаҕа үөрэнэр кэмнэригэр сөп түбэһиннэрэн, икки бөлөххө арахсан, нэдиэлэҕэ иккитэ дьарыктаныахтара.
Күндү оҕолор уонна төрөппүттэр, сүүмэрдээһин иккис түһүмэҕин туһунан буоларын саҕана биллэриэхпит. Биһиги социальнай ситимнэрбитин көрө-истэ сылдьыҥ.
Үүнэр көлүөнэ тыйаатырын пресс-сулууспата.
