Дьокуускайга “Северное сияние” муус пааркаҕа М.П. Максимов аатынан “Мы – дети Севера” муус уонна хаар оҥоһук куораттааҕы VI аһаҕас куонкуруһа саҕаланна. Күрэхтэһии олунньу 27 күнүттэн кулун тутар 1 күнүгэр диэри ыытыллыаҕа.
Куонкурус соруга – хаар-муус оҥоһук эдэр маастардарын сатабылын чочуйуу, үгэһи сайыннарыы, айар-тутар уопуту атастаһыы, ойуулуур-дьүһүннүүр кылаастар үөрэнээччилэрин айар көҕүн көҕүлээһин, дьон-сэргэ кыһыҥҥы-сааскы култуурунай сынньалаҥын өйөөһүн.
Бу куонкурус чэрчитинэн Саха өрөспүүбүлүкэтигэр Оҕо саас сылын даҕата, үөрэнээччилэр уонна педагогтар икки ардыларыгар муус оҥоһук куонкуруһа ыытыллыаҕа. Оттон олунньу 29 күнүгэр Арассыыйаҕа Дьиэ кэргэн сылын чэрчитинэн, оҕолоох дьиэ кэргэннэр хаар оҥоһукка куоталаһыыларын бастакы түһүмэҕэ ыытыллыаҕа.
“Быйылгы куонкуруска Дьокуускайтан, Мэҥэ Хаҥаластан, Тааттаттан уонна Намтан барыта 16 хамаанда кыттыаҕа – 11 – 18 саастаах 36 оҕо. Дьиэ кэргэннэр ортолоругар хаар скульптуратын куонкуруһугар Горнайтан, Тааттаттан, Намтан, Мэҥэ Хаҥаластан уонна Дьокуускай куораттан барыта 10 хамаанда сайаапката киирдэ. Куонкурус түмүгүн кулун тутар 1 күнүгэр 2 №-дээх ДШИ-гэ таһаарыахтара. Миэстэлэспит, анал аакка тиксибит хамаандалар успуонсардар туруорбут мэтээллэринэн, куубактарынан уонна сэртипэкээттэринэн наҕараадаланыахтара”, – диэн Дьокуускай дьаһалтатыгар кэпсээтилэр.
Дьүүллүүр сүбэ чилиэнэ, “Северное сияние” муус паарка дириэктэрэ Алексей Демьянов бэлиэтээбитинэн, үөрэнээччилэргэ уонна настаабынньыктарга үлэлиир үстүрүмүөннэри биэрбиттэр, киирэн иттэр, итии чэй иһэр сылаас дьиэнэн, аһылыгынан хааччыйбыттар.
“Эдэр маастардар хаар уонна муус оҥоһуктара сыл аайы тупсан иһэллэр, хатыламмат кэрэ көстүүлээхтэр, көрбүт эрэ киһини кэрэхсэтэр уран оҥоһуулаахтар. Хомойуох иһин, кинилэр үлэлэрин олус кылгас кэмҥэ эрэ, хаар-муус ууллуор диэри, көрүөххэ сөп. Онон кулун тутарга барыгытын пааркаҕа ыҥырабыт”, – диир Алексей Демьянов.
Yakutia24/Якутия24
