Быйыл ыам ыйын 25 күнүгэр Саха сиригэр аан бастакытын Оһуокай күнүн бэлиэтиэхпит. Бу бэлиэ бырааһынньык 2023 сыл балаҕан ыйын 7 күнүгэр Ил Дархан Айсен Николаев ыйааҕынан олохтоммута. “Тэрээһин оҕо уонна ыччат болҕомтотун национальнай үҥкүүгэ тардар соруктаах”, – диэн СӨ Култуураҕа министиэристибэтэ иһитиннэрэр.
Саҥа бырааһынньык бырагырааматын СӨ бырабыыталыстыбатын бэрэссэдээтэлин солбуйааччы Сергей Местников бигэргэппитэ. Ол курдук, ыам ыйын 25 күнүгэр “Эдэр ыччат оҕолор, эбэ алаас аайы түһүлгэтэ кэҥээтэ, төлкөлөрө тубуста” диэн оскуола выпускниктарын аатыгар улахан оһуокай тэриллиэ.
Ыам ыйын 27 күнүгэр Б.Ойуунускай аатынан Саха тыйаатырыгар Кыыл Уолун аатынан үҥкүү национальнай тыйаатыра “Айыы аймах биһигэр” диэн муусука-хореография испэктээгин көрдөрүө.
Ыам ыйын 27 – 28 күннэригэр “Осуохай – этнокультурное достояние народа саха” диэн оһуокайы харыстааһыҥҥа, сөргүтүүгэ уонна сайыннарыыга анаммыт сугулаан буолуоҕа.
Бэс ыйын 12 күнүгэр Дьокуускайга Доҕордоһуу болуоссатыгар Арассыыйа күнүн көрсөр “Сомоҕолоһуу оһуокайа” тэриллиэҕэ.
Санаттахха, билигин Саха сиригэр 2030 сылга диэри оһуокай сайдыытын кэнсиэпсийэтин оҥоро сылдьаллар.
