“Азия оҕолоро” норуоттар икки ардыларынааҕы успуорт оонньуутун үөрүүлээх арыллыыта бүгүн, бэс ыйын 26 күнүгэр, киэһэ 19:00 чаастан Н.Тарскай аатынан “Туймаада” стадиоҥҥа саҕаланыаҕа. Күрэхтэһии саҕаланыыта хас даҕаны түһүмэхтээх буолуоҕа – кыттыылаахтар, ыалдьыттар парааттарынан саҕаланан баран, Оонньуу уотун уматыынан түктэниэҕэ.
Оонньуу арыллыытыгар аныгы көрдөрөр-иһитиннэрэр технологияны туһанан, “Арктика куйаарыгар айан” диэн тыйаатырдыы дьүһүйүүнү көрдөрүөхтэрэ. Бэҕэһээҥҥи улахан бэлэмнэниигэ тиийэ сылдьан көрдөххө, дьүһүйүү сүрүн дьоруойдара – билиҥҥи кэм ыччаттара – көмпүүтэр иһигэр баар оҥоһуу олоххо (виртуальная реальность) киирэн хаалаллар уонна оҥоһуу өйү кытта Саха сирин дириҥ силистээх-мутуктаах духуобунай баайын арыйан көрдөрөллөр. Ити барыта тыас-уус, ырыа-тойук, уот-күөс, хас эмэ сүүһүнэн оҕо-ыччат кыттыылаах, аргыстаах барар.
Арыллыы култуурунай чааһыгар барыта 3000-тан тахса оҕо, улахан киһи кыттар. Ыалдьаттарга ырыа да ыллаан иһитиннэриэхтэрэ, үҥкүүлээн да көрдөрүөхтэрэ. Уопсайынан, тэрээһин бырагырааматыгар өрөспүүбүлүкэ 24 улууһуттан барыта 68 айар кэлэктиип кыттар. Ол иһигэр хотугу улуустар (11 бөлөх) эмиэ бааллар. Ону таһынан, “Сюприз”, “Маска”, “Бриллианты Якутии”, “Геркилэн”, “Автобус радости” курдук номнуо биллэр, дьон-сэргэ сөбүлүүр кэлэктииптэрэ кытталлар. Биллэн турар, Саха, Нуучча, Олоҥхо, Национальнай үҥкүү, “Гулун”, Үүнэр көлүөнэ тыйаатырдара, циркэ, филармония, Муусука үрдүкү оскуолата, о.д.а. эмиэ бааллар.
“Азия оҕолоро” оонньуу бүгүн саҕаланан баран, от ыйын 7 күнүгэр түмүктэниэҕэ. Онно барыта 24 араас дойду бэрэстэбиитэллэрэ кыттыахтара.
Оонньуулары бу киэһэ 20:00 чаастан “Саха” НКИХ “НВК Саха”, “Якутия 24”, “Мамонт” ханаалларыгар, ону тэҥэ 19:55 чаастан “Матч ТВ” быһа көрдөрүөхтэрэ.
Бэй.кэр.
Хаартыска: Андрей Сорокин, СИА.
