ПААРКАҔА – ЦИРКЭ КАВАЛЬКАДАТА!
Бэс ыйын 27 күнүттэн Дьокуускайга “Мамонтёнок-2024” VII төгүлүн ыытыллар норуоттар икки ардыларынааҕы циркэ бэстиибэлэ саҕаланна. Бэстибээл сүрүн чааһа 3 күн устата ыытыллыаҕа. Бырагыраамата киэҥ-куоҥ. Ол курдук, бэҕэһээ бырабыыталыстыба дьиэтигэр “Циркэ индустриятын эйгэтигэр норуоттар икки ардыларынааҕы сибээһи кэҥэтии суоллара” киэҥ хабааннаах пуорум буолла. Бүгүн бэстибээл аһыллыытыгар улахан тэрээһин, пресс-кэмпириэнсийэ ыытыллыахтара. Марфа, Сергей Расторгуевтар ааттарынан Саха судаарыстыбаннай циркэтин “Земля Мамонта” этно-туруоруута көрөөччүлэри түмүөҕэ. Бу дьоһун туруоруу Саха сиригэр эрэ буолбакка, тас дойдуларга эмиэ биллэр-көстөр. Бэстибээли гала-туруоруу түмүктүөҕэ, кыайыылаахтар, призёрдар бастыҥ нүөмэрдэрин көрдөрүөхтэрэ. Салгыы от ыйын 7 күнүгэр диэри “Мамонтёнок-2024” норуоттар икки ардыларынааҕы циркэ бырагыраамата көрөөччүлэри түмүөҕэ.
“Мамонтёнок” бэстибээл уулусса шоутуттан – кавалькаданан – саҕаланна. Циркэ артыыстара, уһуйуллааччылара көстүүмнэрин кэтэн, уобарастарыгар киирэн, Култуура уонна сынньалаҥ пааркатыгар парааттаан хаамтылар. Ордук оҕо аймах үөрүүтэ үксээтэ, ырыа-тойук аргыстаах, үҥкүү-битии доҕуһуоллаах, уоттаах-күөстээх чаҕылхай тэрээһини олус сонургуу, сэҥээрэ-сэргии көрдүлэр.
Сергей Расторгуев, Саха судаарыстыбаннай циркэтин дириэктэрэ:
– Кавалькадаҕа бэстибээл кыттааччылара, олохтоох циркэ артыыстара, оҕо циркэтин устуудьуйата кытыннылар. Кыттааччы уопсай ахсаана – 350 кэриҥэ киһи. Үс аттаах бухатыыр бырааһынньык хаамыытын саҕалаатылар. Икки бухатыыр Арассыыйа уонна Саха сирин былаахтарын күөрэччи тутан киирдилэр. Кинилэр кэннилэриттэн бочуоттаах ыалдьыттарбыт, бэстибээл кыттааччылара дойдуларын былааҕын тутан хаамтылар. Көрдөөх клоуннар, акробаттар, жонглёрдар, дрессировкаламмыт кыыллар көрөөччүлэр болҕомтолорун тартылар, пааркаҕа мустубут сүүһүнэн куорат олохтоооҕо, ыалдьыттара ытыс дохсун тыаһынан доҕуһуоллаатылар. Кавалькада түмүгэр циркэ артыыстара кыра көрөөччүлэрбитигэр анаан дьоҕус туруорууну көрдөрдүлэр.
Кавалькада кэнниттэн кырачаан көрөөччүлэр цииркэ артыыстарын кытта хаартыскаҕа түстүлэр. Бэстибээл символыгар – мамонтёнокка – хаартыскаҕа түһээри халыҥ уочарат тардылынна. Паарка киинигэр тобус-толору көрөөччү муһунна, оҕо саҥатынан туола түстэ. Чаҕылхай кавалькада чахчы да оҕо саас биир умнуллубат түгэнэ буолла.
ЫСПЫРААПКА:
“Мамонтёнок” – норуоттар икки ардыларынааҕы таһымнаах циркэ бэстибээлэ. Араас жанрга: акробатикаҕа, салгын гимнастикатыгар, жонглированиеҕа, эквилибристикаҕа, бөлөҕүнэн вольтижка, першкэ, клоуннар репризтэригэр уо.д.а. саҥа чаҕылхай талааннары арыйар сыаллаах. Бэстибээлгэ Белоруссияттан, Кытайтан, Казахстантан, Таджикистантан, Въетнамтан, Монголияттан уонна киэҥ нэлэмэн Арассыыйабыт үгүс куоратыттан уопсайа 50 кыттааччы кыттар. Быйылгы “Мамонтёнок” Саха сирин судаарыстыбаннай циркэтэ тэриллибитэ 30 сылыгар ананар. Маны таһынан “Азия оҕолоро” оонньуулар култуурунай бырагырааматыгар киирэр. Маҥнайгы бэстибээл 2004 с. Дьокуускайга тэриллибитэ.
Диана КЛЕПАНДИНА.
