Бэс ыйын 27 күнүгэр “Мамонтёнок” VII төгүлүн ыытыллар норуоттар икки ардыларынааҕы бэстибээл чэрчитинэн “Циркэ индустриятын эйгэтигэр норуоттар икки ардыларынааҕы сибээһи кэҥэтии суоллара” пуорум буолла. Пуорумҥа циркэ ускуустубатын сайыннарарга уонна сибээһи бөҕөргөтөргө бииргэ үлэлэһэр меморандумҥа илии баттастылар.
Саха судаарыстыбаннай циркэтин дириэктэрэ, уус-уран салайааччыта Сергей Расторгуев бэстибээл пуорумугар кытта кэлбит ыалдьыттары эҕэрдэлээн туран, “Мамонтёнок” бэстибээлтэн бэлиэ түгэннэри, Саха циркэтэ тас дойду циркэлэрин кытта хайдах сибээстэһэн үлэлиирин билиһиннэрдэ.
Пуорумҥа Белоруссиятааҕы судаарыстыбаннай циркэ генеральнай дириэктэрэ Владимир Шабан, продюсер Гао Юе (КНР), “Стефани Арт” Арктикатааҕы ааҕыныстыба уус-уран дириэктэрэ Венета Стефани (Болгария), Таджикистан судаарыстыбаннай циркэтин дириэктэрэ Бахтиер Рахматуллозода, Казань судаарыстыбаннай циркэтин дириэктэрэ Эльмира Булатова, Маймари Жапхандаева аатынан Бурятия судаарыстыбаннай циркэтин дириэктэрэ Тудуп Батуев уонна бэстибээл кыттааччылара кытыннылар.
Тас дойду судаарыстыбаннай циркэлэрэ Саха циркэтин кытта сибээһи мэлдьи тутулларын, хардарыта үлэни ыыталларын бэлиэтээн эттилэр.
Ол курдук, Кытай норуодунай өрөспүүбүлүкэтиттэн кэлбит продюсер Гао Юе:
“Биһиги Саха цииркэтин кытта ыкса үлэлэһэбит. Кытайга тэриллэр циркэ бырагыраамаларыгар, бэстибээллэригэр көхтөөхтүк кытталларын көҕүлүүбүт. Саха циркэтэ норуоттар икки ардыларынааҕы сыһыаҥҥа ураты болҕомтотун уурар. Инникитин да Кытай циркэлэрин кытта сибээһи тутуоҕа, бииргэ алтыһан үлэлиэхпит диэн эрэбин”, – диэн санаатын үллэһиннэ.
“Мамонтёнок” бэстибээли Саха судаарыстыбаннай циркэтэ көҕүлээн тэрийбитэ. Норуоттар икки ардыларынааҕы таһымнаах бастакы бэстибээл “Азия оҕолоро” III оонньууларын чэрчитинэн 2004 сыллаахха бэс ыйын 25 күнүгэр ыытыллыбыта. Бэстибээл циркэ ускуустубатын сайдыытыгар норуоттар икки ардыларынааҕы сибээһи бөҕөргөтүүгэ, тас дойдулар судаарыстыбаннай циркэлэрин бэстибээллэрин дириэксийэлэрэ хардарыта уопут атастаһалларыгар, саҥа чаҕылхай талааннары арыйарга улахан суолталаах.
Диана КЛЕПАНДИНА.
