Аҕыйах хонуктааҕыта Сахалайф.ру аан ситимҥэ Сергей Зверев-Кыыл Уолун аатынан Үҥкүү тыйаатырын өр сылларга ситиһиилээхтик салайан кэлбит дириэктэр Александр Алексеевы туох да төрүөтэ суох уураппыттарын туһунан ыстатыйа уонна кэлэктиип аатыттан Ил Дархаҥҥа элбэх илии баттааһыннаах сурук тахсыбыта.
Онно этиллэринэн, Александр Иванович, кэлэр сылга бэлиэтэнэр Кыыл Уолун төрөөбүтэ 125 уонна Үҥкүү тыйаатыра тэриллибитэ 45 сылынан кинигэ таһаараары матырыйаал хомуйар эспэдииссийэ тэрийэн, Сунтаар улууһугар тиийэн култуура управлениетын үлэһиттэрин уонна олохтоохтору кытта көрсүбүт. СӨ Култууратын министиэристибэтэ дириэктэр көҕүлээһинин сөбүлээбэтэх. Ол иһин, Сунтаартан кэлээтин кытары, кинини министиэристибэҕэ ыҥыран дириэктэр дуоһунаһыттан ууратыллан Сүбэһит буоларын, онон баҕа өттүнэн сайабылыанньа суруйуохтааҕын туһунан иһитиннэрбиттэр.
Онон, Александр Алексеев Судаарыстыбаннай Үлэ иниспиэксийэтин Саха сиринээҕи салаатыгар тиийэн көмө көрдүүргэ күһэллибит. Үлэһиттэр бырааптарын көмүскүүр уоргаҥҥа министиэристибэ салалтатын дьайыытыгар чопчу сокуону кэһии баарын көрбүт уонна суукка үҥсүү суруйарыгар сүбэлээбит. Ууратыллыбыт дириэктэр, биллэн турар, сууттаһарга бэлэмин биллэрбит.
Салгыы «салайааччытын урукку да өттүгэр көмүскэһэн кэлбит тыйаатыр кэлэктиибэ эмиэ көмүскэлгэ турда» диэн суруйдулар. Ол курдук, Ил Дархан Айсен Николаев аатыгар дириэктэри дуоһунаһыгар хаалларар туһунан 88 илии баттааһыннаах көрдөһүү сурук барбыт. Манна сурулларынан, Александр Иванович 1992 сыллаахха Саха сирин судаарыстыбаннай ансаамбыла Национальнай үҥкүү тыйаатыра буоларыгар олук уурбут, төрүттэспит киһинэн буолар. Ол да иһин Бастакы Бэрэсидьиэн Михаил Николаев Ыйааҕынан тэриллибит саҥа тыйаатырга дириэктэринэн кинини анаабыттар. «Ол кэмтэн тыйаатыр үрдүк таһымҥа тахсан саҥаттан саҥа ситиһиилэнэн, Арассыыйа биллиилээх исписэлиистэрин кытта үлэлэһэн чулуу айымньылары туруоран, саха үҥкүүтүн аар саарга аатырдан ньиргиччи үлэлиир» диэн кэлэктиип суругар этиллэр.
Маны сэргэ, Ил Дархан аатыгар Александр Алексеевы ууратыы сиэрэ суоҕун туһунан Н.А.Римскэй-Корсаков аатынан Санкт-Петербурдааҕы судаарыстыбаннай консерватория профессора И.С.Воробьев суруйан ыытта. «Ситим» балеты туруорууга үлэлэспит балетмейстер Олег Марков, балет устуоруга уонна кириитигэ Вероника Кулагина маннык сатабыллаах салайааччыны ууратыыны кытта сөбүлэспэттэрин биллэрдилэр. Дириэктэр көмүскэлигэр РФ Тыйаатырдарын диэйэтэллэрин сойууһа эмиэ турунна.
Онуоха, алтынньы 9 күнүгэр ууратыллыбыт Александр Алексеев миэстэтигэр хайыы сахха саҥа дириэктэр эбээһинэһин толорооччу быһыытынан Култуура уонна ускуустуба колледжын преподавателин Саргылаана Борисованы аҕалан кэлэктиипкэ билиһиннэрбиттэр. Хореограф Саргылаана Иннокентьевна, култуураҕа балай эмэ үлэлээбит дьон сиэринэн, үрдүк үөрэхтээх, СӨ култуура туйгуна бэлиэлээх, махтал суруктардаах, бочуотунай грамоталаах. Барыта 24 сыл ыстаастаах. Итинтэн 17 сылын оҕолору үҥкүүгэ үөрэппит.
Бэйэ кэр.
