А.Д. Макарова аатынан Култуура уонна ускуустуба колледжын устудьуоннара “Престиж” диэн эдэр балетмейстердэр норуоттар икки ардыларынааҕы куонкурустарыгар Гран-при хаһаайыннара буоллулар.
Алтынньы 25 күнүгэр Улаан Удэ куоракка “Престиж” диэн эдэр балетмейстердэр норуоттар икки ардыларынааҕы II куонкурустара түмүктэннэ. Бу куонкуруска Монголияттан, Кытайтан, Иркутскайтан, Забайкальеттан, Тываттан, Казахстантан, Бурятияттан уонна Саха сириттэн устудьуоннар уонна анал идэлээхтэр хореографияҕа күрэхтэстилэр.
II “Престижкэ” Саха сирин аатын А.Д. Макарова аатынан Саха сиринээҕи култуура уонна ускуустуба колледжа көмүскээн, “Аныгы үҥкүү” диэн түһүмэххэ муҥутуур ааты – Гран-прины – ылары ситистэ.
Колледж “Хореографическое творчество” салаатын 4-с кууруһун устудьуоннара Владислав Яковлев уонна Вячеслав Яковлев, ону тэҥэ 2-с куурус устудьуона Георгий Уваровскай дьүүллүүр сүбэҕэ Станислав Васильев салалтатынан айыллыбыт “Нэһилиэстибэ” туруорууну көрдөрдүлэр. Кыайыылаахтары наҕараадалыыр сиэр-туом Н.А. Бестужев аатынан Нуучча судаарыстыбаннай драм. тыйаатырыгар буолла.
“Норуоттар икки ардыларынааҕы түһүлгэҕэ ситиһии – профессионализм уонна бэлэмнэнии үрдүк таһымын көрдөрөр, биһиги колледжпыт онон киэн туттар. Бу кыайыы – устудьуоннарбыт уонна уһуйааччыларбыт дьүккүөрдээх уонна айымньылаах үлэлэрин түмүгэ. Сиэрдээх кыайыыларынан устудьуоннарбытын уонна уһуйааччыларбытын эҕэрдэлиибит! Эһиги үлэҕит-хамнаскыт уонна талааҥҥыт коллеһы уонна саха култууратын өрөспүүбүлүкэ таһыгар ааттатар!” – диэн колледж дириэктэрэ, Ил Түмэн дьокутаата Захар Никитин бэлиэтиир.
Колледж уһуйааччылара уонна устудьуоннара куонкуруска кыттыбыттарын таһынан, Улаан Удэ куоракка Илин-Сибиирдээҕэ судаарыстыбаннай култуура институтун (ВСГИК) хореография ускуустубатыгар кафедратын 50 сылыгар анаммыт тэрээһиҥҥэ сырыттылар. Ити бэлиэ түгэн чэрчитинэн, кинилэр “Хореография ускуустубата уонна үөрэҕирии: аныгы түөрүйэ, методика уонна быраактыка” идэ таһымын үрдэтэр кууруһу аастылар, аныгы хореографияҕа, бүрээт уонна монгуол үҥкүүлэригэр маастар-кылаастары көрдүлэр.
Култуура уонна ускуустуба колледжын пресс-сулууспата.
