Сэтинньи 1 күнүгэр 19:00 чаастан «Пятница!» тэлэханаалга «Царица» вокальнай шоу саҕаланар. Манна Дьокуускайтан 22 саастаах Айыллаана Макарова кыттыаҕа.
Шоуга норуоттан тахсыбыт кыргыттар улахан сцена «сулуһа» буоларга холонуохтара. Күрэҕи Ольга Картункова салайан ыытыаҕа. Дьүүл сүбэтигэр Арассыыйа норуодунай артыыһа Лариса Долина, биллиилээх ырыаһыттар Наташа Королёва, Алсу, Алена Свиридова, Валерия, ырыаһыт уонна ыытааччы Регина Тодоренко, продюсер Яна Рудковская уонна да атын сулустар баар буолуохтара.
Бырайыак саҕаланыыта сценаҕа Арассыыйа араас муннугуттан 22-тэн 45 диэри саастаах 21 кыыс тахсыаҕа. Бастакы түһүмэх кэннэ 9 кыыс туоратыллыаҕа. Онон, сүрүн састаапка 12 кыыс киириэҕэ. Түмүктүүр финалга түөрт кыыс тахсыаҕа, оттон «Сарыысса» аатын биир эрэ кыыс ылыаҕа. Кини биллини-көстүүнү таһынан 1,5 мөл. солк. тутуоҕа.
Биир дойдулаахпыт Айыллаана оҕо эрдэҕиттэн муусуканан дьарыктанар. Сценаҕа тахсыбыта түөрт сыл буолбут. Муусука араас жаанырын тутуһар, ырыалары таһаарар, ол иһигэр сахалыы эмиэ. Инники «Новые пацанки» реалити-шоуга кыттыбыта. Ол кэннэ улахан артыыс буолар ыра санааламмыта.
Шоу сүүмэрдиир түһүмэҕэр Айыллаана Анет Сай «Слезы» ырыатын толорон «Царица» сүрүн түһүмэҕэр киирэ сатыахтаах. Дьэ, кыыспыт дьүүл сүбэтигэр сөбүлэтэр эбит дуу, суох дуу? Ону сэтинньи 1-гы чөл күнүгэр 19:00 чааска билиэхпит.
Сонун төрдө: «Пятница» тэлэханаал
