Быйыл Ил Дархан Айсен Николаев Уурааҕынан ыам ыйын 25 күнүгэр Оһуокай күнэ олохтоммута. Мантан сиэттэрэн, СӨ Бырабыыталыстыбатын Дьаһалынан оһуокай салгыы сайдарыгар улахан барыл бигэргэммитэ, бырабыыталыстыба бэрэссэдээтэлин солбуйааччы Сергей Местников салайааччылаах хамыыһыйа тэриллибитэ. Онон, саха ытык үҥкүүтэ - Оһуокай өссө даҕаны күүскэ сайдар суолга үктэммитэ.
Ол иитинэн Арассыыйаҕа Сомоҕолоһуу күнүгэр, «Оһуохай» түмсүү уонна Саха сиринээҕи уопсастыбаннай өйөбүл ыстааба Ытык Оһуокайы салгыы хайдах сайыннарар уонна харыстыыр туһунан төгүрүк остуол тэрийдилэр.
Көрсүһүүнү «Оһуохай» түмсүү сүрүннээччитэ Дмитрий Оконешников-Сулусхан тэрийдэ, биллэр суруналыыс, Дархан Этээччи, түмсүү салайааччытын солбуйааччы Марта Николаева-Сарыалыйа иилээн-саҕалаан ыытта. Тэрээһиҥҥэ түмсүү салайааччыта Александр Данилов-Дьулуур Хан, СӨ Норуот айымньытын дьиэтин дириэктэрэ Сергей Семенов, сүрүн исписэлииһэ Александра Васильева, СӨ уопсастыбаннай өйөбүл ыстаабын салайааччыта Саргылаана Неустроева, Үөһээ Бүлүү оройуонун Норуот айымньытын дьиэтин сүрүн исписэлииһэ Людмила Гурьева, Кыыл Уолун аатынан Национальнай үҥкүү тыйаатырын үлэһиттэрэ – дириэктэр эбээһинэһин толорооччу Саргылана Борисова, уус-уран салайааччы Светлана Бессонова, литэрэтиирэ чааһын сэбиэдиссэйэ Вера Черноградская, биллиилээх Дархан, Үтүөлээх этээччилэр, түмсүү кыттыылаахтара Руф Гаврильев, Каджана Евсеева, Аскалон Егоров, Мария Иванова, Пётр Григорьев уонна да атыттар кытыннылар.
Мустубут дьон санаа үллэстэн, тыҥаан турар боппуруостары быһаарсан, Ытык Оһуокай инникитигэр соруктары туруоран Кэнсиэпсийэ ылынары бигэргэттилэр.
Түмсүү салайааччыта Александр Данилов-Дьулуур Хан:
- «Оһуохай» түмсүү кыттааччылара киэҥ далааһыннаах үлэни ыыппыттарын, ыыта сылдьалларын түмүгэр быйылгыттан Оһуокай күнэ баар буолла. Ол иитинэн Дьокуускайга, улуустарга араас таһымнаах тэрээһиннэр ыытылыннылар. Саас Өрөспүүбүлүкэтээҕи улахан пуорум буолан ааспыта, оһуокайы сайыннарар барыл ылыныллыбыта. Оттон саамай сүдү суолталаах сорукпутунан Оһуокай Кэнсиэпсийэтин олоххо киллэрии буолар.
Кэнсиэпсийэҕэ 2035 сылга диэри биһиги Оһуокайбыт сайдарын, харыстанарын, чөлүгэр түһэрин туһугар туох үлэни ыытарбыт ыйыллан олоххо киллэриэхтээхпит. Онон, Өрөспүүбүлүкэтээҕи норуот айымньытын дьиэтин үлэһиттэрин кытта таһымнаах үлэни ыытыахтаахпыт. Бүгүҥҥү санаа атастаһыы, этиллибит этии барыта олоххо киирэригэр дьулуһуохтаахпыт.
Оһуокайбыт сайыннаҕына, биһиги сахалар омук быһыытынан ураты тыыннаныахпыт уонна духуобунай өттүнэн баай буолуохпут! Доом! – диэн Александр Джурович өрө көтөҕүллэн эттэ-тыынна.
Тэрээһин үгэс быһыытынан оһуокайынан түмүктэннэ.
Дмитрий Оконешников-Сулусхан.
