Сэтинньи 2 – 4 күннэригэр Благовещенскай куоракка Бүтүн Арассыыйатааҕы «Магия кукол» күрэс-быыстапка буолан ааста. Манна Арассыыйа хас да регионуттан араас тиэхиньикэнэн оҥоһуллубут 150 үлэ кэлэн турда.
Саха сирин маастардарын үлэлэрин «Кэрэли» кэлэктиип аатыттан Каролина Парфенова уонна Маргарита Алексеева көрдөрдүлэр. Кинилэр илдьибит 25 куукулалаах «Тыгын Дархан» кэллиэксийэлэрин ыалдьыттар сүрдээҕин биһирээтилэр. Бу биллиилээх суруйааччы В.С. Яковлев-Далан суруйбут сэһэнин персонажтарынан айыллыбыт үлэлэр саха омук кутун-сүрүн кэрэһэлииллэр.
Күрэс түмүгүнэн «Тыгын Дархан» кэллиэксийэ, саамай үрдүк наҕарааданы – Гран-прины ылан, саха маастардарын үрдүк таһымнарын өссө төгүл бигэргэттэ. Эҕэрдэлиибит!
Сонун төрдө: "Симэх" киин.
