Быйыл “AYAL | страшные истории” диэн ханаал үлэлээбитэ тохсунньу ыйга биир сылын туолла. Онон сибээстээн, ханаал төрүттээччилэрэ бар дьон дьүүлүгэр “Сэрэтии” диэн маҥнайгы тэттик киинэлэрин устан таһаардылар.
“Сэрэтии” киинэ сүрүн дьоруойа – айыы-абааһы диэҥҥэ итэҕэйбэт, сиэргэ-туомҥа соччо кыһаммат устудьуон уол. Киинэҕэ уол Саңа дьыл бырааһынньыктарын кэмигэр доҕотторун кытары уопсайга хаалан баран, таҥха кэмин бэлиэтииллэрэ ойууланар.
Киинэ сюжетыгар билигин даҕаны дьон өйүн-санаатын аймыыр 3 кэпсээн киирэр: түмэл пуондатыгар харалла сытар дьахтар абааһыта, устудьуоннар уопсайдарыгар кыыһы буулаабыт сибиэн уонна былыргы сиэр-туом оҥоһуллубут сэргэлэрин туһунан.
“Сэрэтиигэ” уһуллубут эдэр дьон бары дьиҥ олохторугар эмиэ иччилээх-абааһылаах түбэлтэлэргэ түбэспит, куттанар-дьулайар диэни эт хааннарынан билбит артыыстар. Кинилэр “AYAL | страшные истории” ханаалга ыалдьыттаабыттара, дьиң олоххо буолбут кэпсээннэрин сырдаппыттара. Ол – Лера Неустроева, Эрэл Потапов, Рудольф Елизаров, Екатерина Перова уонна Николай Уаров.
“Сэрэтии” тэттик киинэни “MOST.Video” диэн сигэнэн көрүөххүтүн сөп. Сыылката: https://appmost.ru/streaming