Аҕыйах хонуктааҕыта Харбалаахха дьоһун тэрээһин буолла. Онно «Сыл бастыҥнарын» чиэстээтилэр. Бу тэрээһин чэрчитинэн биһиги оскуолабыт учуутала Валентина Кривошапкина Арассыыйаҕа «Дьиэ кэргэн», «Саха сиригэр оҕо сылын» түмүктүүр «Олох төрдө – дьиэ кэргэн» Орто Амма тыа сирин иһинэн тэрийбит дьиэ кэргэн хаһыатын күрэҕин түмүгүн иһитиннэрдэ.
Хаһыаты оҥоруу ирдэбилигэр дьиэ кэргэни билиһиннэрии, төрүччүнү оҥоруу, оҕону иитиигэ, сайыннарыыга дьиэ кэргэн туттар ураты ньымаларын билиһиннэрии, оҕо дьиэ кэргэнин уруһуйдааһына, оҕолорун ситиһиилэрин сырдатыы киирбитэ. Төрүччүнү оҥорууга хас биирдии аймах киһи аатын таһыгар кини дьоҕурун, талаанын, идэтин хайаан да суруйуу ирдэммитэ. Маннык үлэ дьиэ кэргэҥҥэ геннэй информацияны билиигэ, онно олоҕуран оҕо талаанын сайыннарыыга, идэҕэ хайысхалыырга туһалаах буоллун диэн Валентина Семеновна киллэрбит.
Олус дириҥ ис хоһоонноох хаһыаттар оҥоһуллан кэлбиттэр. Ону барытын Сынньалаҥ киинигэр тэниччи тардан көрдөрдүбүт. Анал хамыыһыйа сыаналааһынынан Лидия Петровна, Николай Николаевич Винокуровтар дьиэ кэргэн хаһыаттара «Кылаан чыпчаал» үрдүк ааты сүгэн, «Төрүччү» кинигэнэн бэлиэтэннэ. Вероника Николаевна, Петр Петрович Винокуровтар, Прасковья Романовна, Владимир Викторович Бурмистровтар, Дария Владимировна, Егор Станиславович Атасыковтар дьиэ кэргэн хаһыаттара бары ирдэбилгэ эппиэттииллэрин, дириҥ ис хоһоонноохторунан маҥнайгы миэстэни ылан, «Саха ыалын сиэрэ-туома» кинигэни бэлэх туттулар.

Валентина Семеновна бу бырайыагынан 2019 сыллаахха бүтүн Арассыыйа үрдүнэн ыытыллыбыт «Языки и культура народов России: сохранение и развитие» куонкуруска кыайыылаах үрдүк аатын сүгэн турар. Өссө үтүө холобур буоллун диэн билиһиннэрдэххэ, бу ийэлэрин бырайыагын Валентина Семеновна дьиэ кэргэнэ үбүлээн, бириистэри туруоран кэллилэр. «Бастаан саҕаланыытыгар сүүһүнэн хаһыат кэлэрэ», – диэн ахтар бырайыак ааптара.
Айымньылаах үлэлээх аҕа сүбэһиппэр Валентина Семеновнаҕа махтанабын, үрдүккэ кынаттыыр үлэтигэр ситиһиилэри баҕарабын!
Варианна Макарова, Н.Е. Мординов аатынан Харбалаахтааҕы үөрэх холбоһугун иитэр үлэни тэрийээччитэ.