Арааһа, Саха сиригэр “Көмүлүөк” бренд туһунан истибэтэх, билбэт киһи диэн суох буолуохтаах. 20 сыл устатыгар саха төрүт иһитин-хомуоһун уонна сүбэниирин оҥорон таһаарар эргиэн-производство хампаанньатын бородууксуйатын саха дьоно эрэ буолбакка, араас омук биһирээтэ.
Биһиги “Көмүлүөк” ТПК төрүттээччитэ уонна солбуллубат салайааччыта Ольга Григорьевна Григорьеваны кытта элбэх оҕолоох ыал ийэтэ төрүт иһити мөлүйүөннээх бреҥҥэ хайдах кубулуппутун билээри кэпсэттибит.
Ыспыраапка:
Ольга Григорьевна Григорьева, “Көмүлүөк” эргиэн-производство хампаанньатын төрүттээччитэ уонна генеральнай дириэктэрэ, “Сделано в Якутии” СӨ Урбаанньыттарын ассоциациятын бэрэссэдээтэлэ, СӨ Уопсастыбаннай палаататын чилиэнэ, СӨ Остуол төрүт оонньууларын федерациятын бэрэсидьиэнэ, Арассыыйа Урбаанньыт дьахталларын сойууһун чилиэнэ, элбэх оҕолоох ыал ийэтэ, тапталлаах кэргэн.
– Ольга Григорьевна, айар үлэҥ аартыктаах суола хайдах тыргыллыбытай? Тоҕо чуолаан иһиккэ-хомуоска ылсан үлэлэспиккиний?
– Оскуоланы бүтэрэн баран, ханнык үөрэххэ туттарсарбын уһуннук толкуйдуу барбатаҕым – Саха судаарыстыбаннай университетыгар саха тылын уонна култууратын факультетыгар киирэрим туһунан эрдэттэн быһаарыммытым, онон саарбахтаабат этим.
Оһуор-мандар оҕо эрдэхпиттэн умсугутар этэ: билэҕит дуо, оһуору кинигэ курдук арыйан ааҕыахха сөбүн? Оһуорга алгыһы, баҕа санааны иҥэрэн ойуулаан, бэчээттээн ылыахха сөбүн? Ураты кистэлэҥнээх, туох эрэ сүдү күүстээх, иччилээх курдук. Мин араас эйгэҕэ арааһы бары боруобалыы сылдьыбытым. Холобур, биэс сылтан ордук Ростелеком сибээс тэрилтэтигэр сэкирэтээринэн уонна иниспиэктэр-эпэрээтэринэн үлэлээбитим. Ол сылдьан эмискэ идэбин тосту уларытыахпын баҕарарбын өйдөөбүтүм. Мин олох айар эйгэлээхпин уонна айылҕабын муҥура суох таптыыбын. Бу сыллар тухары үлэм сүрүн үстүрүмүөнэ илиим буоларын өйдөөбүтүм. Тарбахпынан тутан-хабан, оҥорон үлэлээтэхпинэ эрэ дуоһуйабын, онтон дьоллонобун. Хайаан да тугу эрэ айыахтаахпын, оҥоруохтаахпын. Тоҕо чуолаан иһити талбыппын бу диэн этэр кыаҕым суох эбит. Арааһа, иһит миигин бэйэбин таллаҕа! Билигин ити мин сүрүн үлэм, айар абылаҥым, сынньалаҥым, көтүтэр күүһүм, эйгэм.
– Бу дьыалаҥ тута табыллан барбыта дуу эбэтэр түһүү, батыллыы эмиэ баара дуу?
– Туораттан көрдөххө, ситиһии устуоруйата олох остуоруйаҕа майгынныыр курдук. Ол эрээри итини бу уустук суолу ааспыт эрэ киһи билэн эрдэҕэ. Күн бүгүн салайар “Көмүлүөк” хампаанньам бородууксуйата, омуннаабакка эттэххэ, Саха сирин хас биирдии дьиэтигэр баар буолла. Төрүт матырыйаалынай уонна духуобунай култуурабытын иһит көмөтүнэн харааннаан сыл ахсын сайдабыт, олохтоох оҥорон таһаарыыны сайыннарабыт. Ситиһиим устуоруйата быыкаа гараастан саҕаламмыта, онно чааскыга, тэриэлкэҕэ ойуу түһэрэр арт-устуудьуйаны үлэлэппитим. Онтубун ким даҕаны атыыласпат этэ, сүрүннээн, доҕотторбор уонна чугас дьоммор бэлэх курдук ыыппытым.
– Сүрүн үлэҥ таһынан өссө уопсастыбаннай үлэҕэ көхтөөхтүк кыттаҕын. Ол эйиэхэ тугу биэрэрий?
– 20 сыл устата производствоҕа уонна биисинэскэ эҥкилэ суох үлэлээтим. Социальнай хайысхалаах тэрилтэни атаҕар туруоран баран, бигэтик производственник уонна салайааччы буолан таҕыстым диэхпин сөп. Миэхэ элбэхтик дьон-сэргэ сүбэ-ама, көмө көрдөөн кэлэр буолбута.
Кыахтаах, эрчимнээх, үлэлиир баҕалаах эрдэхпинэ, төрөөбүт өрөспүүбүлүкэбит сайдыытыгар көмөлөһөр, уопсастыбаннай суолталаах бырайыактарга кыттыһар уонна тэрийсэр аналлаахпын дии саныыбын. Ити – мин миссиям.
– Дьоҕус биисинэскэ 20 сыл диэн балай да улахан кэм. Бу олорон тэрилтэҥ саамай сүрүн ситиһиитэ туох дии саныыгыный?
– Мин санаабар, биһиги сүрүн ситиһиибит – саха норуотун матырыйаалынай уонна духуобунай култууратын харааннааһын уонна үүнэр көлүөнэҕэ тиэрдии, сайыннарыы. Биһиги кыттыгас үлэбит түмүгэр хас биирдии саха киһитэ оҕо эрдэҕиттэн чороон, кытыйа, көмүлүөк туһунан билэр эрэ буолбатах, ону күннээҕи олоҕор туһанар буолла.
Сыл ахсын “Көмүлүөк” хампаанньа сайдыы саҥа таһымыгар тахсар уонна саҥаттан саҥа оҥоһугу тэнитэр. Күн бүгүн тэрилтэбит “ТУОЙАРТ” диэн туой иһити оҥорон таһаарар толору сыыкыллаах тэриллэрдээх: туойунан охсуу мастарыскыайдара итиэннэ саха омук туойга сатабылын сайыннарарга туһуламмыт Саха сирин Туойдьуттарын сойууһа тэриллибиттэрэ.
“АлтанАрт” ювелирнай бреммитин кэрэни кэрэхсээччилэр олус сөбүлээтилэр. Бу бренд уран оҥоһуктара Сахабыт сирин кэрэтин, ураты майгытын саха төрүт киэргэллэригэр иҥэрбитэ. Маны таһынан “Этностиль” сахалыы текстиль брендэ биһирэнэр.
– Үбүлүөйдээх 2025 сылга туох былааннааххытый?
– Биһиги куруук айар үлэ абылаҥар сылдьабыт, саҥаттан саҥаны тобула сатыыбыт. Фарфор ускуустубата – олох атын, ураты тыл. Аны, дьиктитэ диэн, ыал буолан 20 сыл олорбут дьон фарфордаах урууларын бэлиэтииллэр дии – ити биһиэхэ эмиэ ураты сиимбэл суолталанна. Билигин биһиги “суолбут саҥа саҕаланна” диэн өйдүүбүт.
Саха төрүт иһитин көмөтүнэн киһиэхэ барытыгар туһалааҕы аҕалыахпытын, устуоруйабытын кэпсиэхпитин сөп. Биһиги омук култуурунай кодун, тылбытын-өспүтүн, литэрэтиирэбитин үүнэр көлүөнэҕэ тиэрдэрбит, сайыннарарбыт олус наадалаах.
