СӨ Үүнэр көлүөнэ тыйаатыра Арассыыйаҕа Аҕа дойдуну көмүскээччи, Саха сиригэр Ийэ дойдуну көмүскээччи сылын оскуолатыгар Маргариты Алигер поэматынан СӨ үтүөлээх артыыһа Валентина Якимец туруорбут «Зоя» моно испэктээги Дьокуускай куорат 13 №-дээх көрдөрүүнэн арыйда. Зоя Космодемьянская туһунан айымньыны Аҕа дойду Улуу Кыайыытын 80 сылыгар уонна Ленинград блокадатын уһулуу 81 сылыгар анаан туруордулар.
Тыйаатыр уус-уран салайааччыта Алексей Павлов оҕолорго Ленинград блокадатын көҥү көтүүгэ кыттыбыт аҕатын Прокопий Алексеевич туһунан кэпсээтэ. Гвардия ыстаарсай лейтенана Павлов — Аҕа дойду I истиэпэннээх уордьаннарын уонна икки бойобуой мэтээл кавалера, Үрдүкү главнокомандующай Иосиф Сталинтан түөрт Махтал суруктаах байыас. Сэрии кэннэ – САССР үтүөлээх учуутала, педагогическай үлэ бэтэрээнэ. Прокопий Павлов аатын Бүлүү улууһун I Күүлэт нэһилиэгин уулуссата уонна орто оскуолата сүгэллэр.
Испэктээк иннинэ тыйаатыр артыыһа Анастасия Петрова «Эхо любви» ырыаны толорон иһитиннэрдэ. Антон Ботаков Суруйааччы, оттон Елизавета Далбараева эдэр Зоя оруолларын толордулар. Оҕолор испэктээк бүтүүтэ артыыстарга уонна туруорааччыларга туран эрэ таһыннылар.
Сонун төрдө: CӨ Үүнэр көлүөнэ тыйаатыра