Ил Дархан Айсен Николаев уонна филармония салайааччыта Туйаара Пестрякова Арктикатааҕы эпос уонна ускуустуба киинигэр филармония акустическай саалатын арыйыы боппуруостарын дьүүллэстилэр.
Туйаара Пестрякова этэринэн, бу саалаҕа симфоническай аркыастыр киэнэ эрэ буолбакка, духовой аркыастыр, камернай ансаамбыллар, хор бырагыраамалара эмиэ толоруллуохтара. Филармонияҕа хас даҕаны айар бөлөх киирэр, олортон саамай бөдөҥө – «Symphonica Artica» судаарыстыбаннай симфоническай аркыастыр. Бу аркыастыр дойду эрэгийиэннээҕи филармонияларын ортотугар биир саамай бастыҥнара буолар.
Айсен Николаев бэлиэтээбитин курдук, бачча бэртээхэй кэнсиэр саалата аһыллыннаҕына, саха дьоно дойду уонна аан дойду бастыҥ мусукаааннара толорор классическай академическай муусукаларын истэр кыахтаныахтара. Кини дойду мусукаалынай каартатыгар саҥа акустическай кэнсиэр саалатын туһунан иһитиннэриини киллэрэр соругу туруорда.
Быйыл филармония репертуара Аҕа дойду Улуу сэриитигэр Кыайыы 80 сылыгар ананар. Ол быһыытынан, кулун тутар 19-гар, симфоническай оркестр төрөөбүт күнүгэр, Дмитрий Шостакович аатырбыт Сэттис симфонията, норуокка биллэр Ленинград симфонията толоруллуоҕа. Манна билиҥҥи кэм биир чаҕылхай музыкана, виолончелист Денис Шаповалов кыттыаҕа.
Санатан эттэххэ, Айсен Николаев Арктикатааҕы эпос уонна ускуустуба киинин Саха сирин судаарыстыбаннаһын күнүгэр арыйарга сорудахтаабыта.
Сонун төрдө: СӨ Бырабыыталыстыбатын уонна Ил Дарханын пресс-сулууспата
