«Арассыыйа тыйаатырдарын туруорууларын кыһыл көмүс пуондата» бырайыакка Саха сирин түөрт тыйаатыра киирдэ. Бырайыак РФ Тыйаатырдарын диэйэтэллэрин сойууһун 150 сылыгар ананар уонна дойду тыйаатырдарын үйэлээх баайын тарҕатыыга, төрүт сыаннастарга тирэҕирэр култуура куодун үөскэтиигэ туһуланар.
«Кыһыл көмүс пуондаҕа» Саха сириттэн киирдилэр: Олоҥхо тыйаатырын Степанида Борисова 2013 с. туруорбут «Удаҕан кыргыттар» испэктээгэ, Саха тыйаатырын Андрей Борисов 1982 с. туруорбут «Желанный голубой берег мой» испэктээгэ, Опера уонна балет тыйаатырын Андрей Борисов 2022 с. туруорбут «Ньургун Боотур» испэктээгэ, Аҕыйах ахсааннаах төрүт хотугу омуктар тыйаатырдарын Сергей Потапов 2024 с. «Золотые слезы синей птицы» туруоруута.
Бу испэктээктэр тустарынан дойду сырдатар-иһитиннэрэр эйгэтигэр киэҥник кэпсиэхтэрэ уонна өйдөбүнньүк сэртипикээттэринэн бэлиэтиэхтэрэ. Маны сэргэ пуондаҕа киирбит туруоруулар тэлэбиидэнньэлии биэрсийэлэрин бэлэмнээн, «Большой эфир» ханаалга көрдөрүөхтэрэ.
Сонун төрдө: СӨ Култуура уонна духуобунай сайдыы министиэристибэтэ
