Кулун тутар 13-18 күннэригэр “Манеж” диэн быыстапка киин саалатыгар төрдүс төгүлүн Москубатааҕы муода нэдиэлэтэ ыытыллыаҕа. Манна “INNIKI” уонна “Киэргэ” саха бреннэрэ кыттыгас кэллиэксийэлэрин көрдөрүөхтэрэ.
“Муус үҥкүүтэ” кэллиэксийэ дизайнера – Изабелла Дордосова. Кинини бу уобарастары оҥорууга ирбэт тоҥ ириэнэҕэ, саас уһуктуута уонна хотугу айылҕа кэрэтэ көҕүлээбит. Кэллиэксийэ таҥастара тымныыны уонна сааскы кэми бэлиэтииллэр, муус кэрэтин уонна күүһүн тиэрдэллэр. Манна дьиҥнээх матырыйааллар туттуллубуттар – солко органза, түү.
“Киэргэ” киэргэллэрэ кэллиэксийэ улахан аҥаарын ыллылар. Кинилэр хаар ньуурун, муус ойууларын уонна көһөҥө мууһу санаталлар. Көмүһүнэн, үрүҥ көмүһүнэн уонна күндү тааһынан оҥоһуллубуттар.
“INNIKI” бренд Москубатааҕы муода нэдиэлэтигэр төрдүс кыттыыта. Быйыл араас омук моделлара подиумҥа тахсан кэллиэксийэ дэгиттэр уратытын уонна аан дойдутааҕы тыынын тоһоҕолоон бэлиэтиэхтэрэ.
Маннык улахан тэрээһиҥҥэ төрүт үгэстэри уонна аныгы сүүрээннэри дьүөрэлиир саха бреннэрэ кытталара өрөспүүбүлүкэ муодата саҥа таһымҥа тахсарын өссө төгүл бигэргэтэр.
Бэйэ кэр.
