Аламай таас – күлүмүрдүүр таас: саамай кытаанах минерал тулхадыйбат доҕордоһуу бэлиэтэ буолбутун туһунан

Үгүс киһи көрдөһүүтүнэн, “Саха” НКИХ ханаалга “Аламай таас” (“Сияющий камень”) сэрийээли иккистээн көрдөрүөхтэрэ. Кулун тутарга алмаас бырамыысыланнаһыгар – өрөспүүбүлүкэ бүддьүөтүн хааччыйар саамай тутаах эйгэҕэ – үлэлиир ыччат дьон туһунан бастакы сахалыы сэрийээли национальнай тэлэбиидэнньэ ханаалыгар көрдөрүөхтэрэ.

Кулун тутар 17 күнүттэн саҕалаан муус устар 10 күнүгэр диэри “Саха” НКИХ ханаалга дьон-сэргэ кутун туппут “Аламай таас” сэрийээли өссө биирдэ көрүөхтэрэ. Бу сырыыга сэрийээли нууччалыы субтитрдаах таһаарыахтара.

Сэрийээл сүрүн дьоруойдара Мииринэй куоракка олороллор уонна үлэлииллэр. Киинэҕэ аҥаардас куорат эрэ буолбакка, бырамыысыланнай эбийиэктэр ис уонна тас барааннара көстүөҕэ, кый ыраах тайҕа быыһыгар уһуллубут көстүүлэр эмиэ бааллар. “Саха” НКИХ сэрийээл сулууспатын салайааччыта Марфа Пермякова этэринэн, киинэ устааччылар “Аламай таас” сэрийээлинэн ыччат дьону бырамыысыланнаһы кытта ситимнээх идэлэри таларга көҕүлүүр, кинилэр болҕомтолорун тардар соруктаах устубуттар: “Холобур, биһиги сэрийээлбит дьоруойдара геодезистар, геофизиктар, суоппардар, диспиэччэрдэр. Ол гынан баран, итинник идэлээх дьон булгуччу киинэҕэ көстөрүн курдук эрэ үлэлиир буолбатахтар. Биһиги көннөрү “маннык идэлэр бааллар” диэн көрдөрүөхпүтүн баҕарбыппыт. Туох да диэбит иһин, ити дьиҥнээх геофизиктар уонна геодезистар буолбатахтар, ити – кинилэр уобарастара эрэ”.

Сэрийээл киинэ эйгэтигэр саҥа ааттары таһаарда – ыччаттар киинэ туһугар дууһалыын ыалдьан, оруолларын ис сүрэхтэриттэн кыһаллан толордулар уонна дьон-сэргэ үөрүүлээх, сөхпүт, астыммыт харда тылын иһиттилэр. Сэрийээл ааптардара этэллэринэн, төһө даҕаны киинэни олоххо чугаһатар сыаллаах документальнай киинэ каадырдарын туһанналлар, бу сэрийээл документальнай киинэ буолбатах. Ону таһынан, сэрийээлгэ олус элбэх оҥорон таһаарыыны кытта быһаччы ситимнээх түгэн көстөр. Ол “дьиҥнээх, олоххо баар хартыынаны киинэҕэ илэ көрдөрөргө” олус туһалаабыт. Оттон Мииринэй куорат көстүүтэ сэрийээли олус киэргэппит, барыларын болҕомтотун тардыбыт.

Сэрийээл биир сүрүн оруолун АЛРОСА иһинэн үлэлир “Анаабыр алмаастара” хампаанньаҕа хайа маастарынан үлэлиир Павел Сидоров толорбут. Кини Игнат диэн ааттаах дьоруойа успуордунан дьарыктанарын сөбүлүүр, күүстээх-уохтаах, айылҕаттан холку ыччат. Ол гынан баран, кини олох араас кыһалҕатын көрсөр.

“Бу мин бастакы холонуум – кастиҥҥа даҕаны, киинэҕэ даҕаны. Сюжета атын сэрийээллэртэн биллэ уратылаах, онон эмиэ интэриэһинэй. Олоҕу кытта ыкса ситимнээҕин, киһини олох араас өрүтүн туһунан толкуйдатарын иһин сөбүлээтим. Бу киинэни көрөн баран ыччат дьон бырамыысыланнас эйгэтин атын хараҕынан көрүө, баҕар, кимнээх эрэ үлэлии барыахтара диэн эрэнэбин. Бэйэм 2022 сылтан “Анаабыр алмаастара” хампаанньаҕа хайа маастарынан үлэлиибин. Сэрийээли устарга көмөлөспүт хампаанньабытыгар улахан махталбын тиэрдэбин, кини чэчирии, сайда турарыгар баҕарабын”, – диир Павел.

“Аламай таас” сэрийээли көрөөччүлэр “саха дорамата” диэн сүрэхтээтилэр. Манна хас биирдии киһи бэйэтин биһирэмнээх дьоруойун булуоҕа, кини туһугар ис сүрэҕиттэн ыалдьыаҕа, тэҥҥэ үөрүөҕэ.