Ааспыт нэдиэлэҕэ Өлүөхүмэ улууһугар эбэҥки култууратын харыстыырга анаммыт хас да тэрээһин ыытылынна. Ол иһигэр кулун тутар 12 күнүгэр Тээнэ эбэҥки национальнай нэһилиэгэр “Языковое гнездо” социальнай бырагыраама чэрчитинэн (ааптара – Саха сирин эбэҥкилэрин Бэгинэ, Саха сирин эбэҥкилэрин ассоциациятын бэрэсидьиэнэ, тыл билимин дуоктара Александр Варламов) “Мутни Дюганмун” дьиэ кэргэн династияларын күрэҕэ тэрилиннэ.
Эбэҥки ассоциацията Тээнэҕэ эбэҥки тылын харыстааһын уонна сайыннарыы бырагырааматын Нордголд хампаанньа өйөбүлүнэн үлэлэтэр. Бу хампаанньа Өлүөхүмэ оройуонугар үлэни ыытар.
Күрэх хас да түһүмэхтээх буолла. Бастакы түһүмэххэ кыттааччылар дьиэ кэргэннэрин билиһиннэрдилэр, төрүттэрин сырдаттылар. Айар түһүмэх эмиэ баар – эбэҥки тылынан хоһоон аахтылар, ыллаатылар-туойдулар, үҥкүүлээн битийдилэр. Маны сэргэ эбэҥки былыргы остуоруйаларын, номохторун матыыбынан сыаҥка көрдөрдүлэр. Түмүктүүр түһүмэххэ национальнай истииллээх авангард көстүүмнэрин көрдөрдүлэр. Манна эдэр кыттааччылар кытыннылар.
Кыттааччылар үтүктүспүт курдук, бары чаҕылхайдар, онон дьүүллүүр сүбэҕэ уустук сорук турда. Бочуоттаах үһүс миэстэни Мальчекитовтар дьиэ кэргэннэрэ ылла, бытовой тиэхиньикэни атыылаһарга сэртипикээтинэн наҕараадаланна.
Иккис миэстэни Марфа, Андрей Габышевтар дьиэ кэргэннэрэ ылан, булт тэрилин атыылаһарга сэртипикээт туттулар.
Кыайыылаах үрдүк аатын Сардаана, Борис Габышевтар сүктүлэр. Кинилэр сүрүн бирииһи – бурааны – ылар чиэскэ тигистилэр. Габышевтар дьиэ кэргэн биэс оҕолоохтор. Ыал ийэтэ бибилэтиэкэринэн, аҕалара үйэ чиэппэрэ кэриҥэ табаһытынан үлэлээбит.
Кыттааччылар бары анал ааты ыллылар уонна харчынан бириэмийэни туттулар.
Тэрээһин “Гиркэлэн” уонна “Черода” эбэҥки национальнай ансаамбыллара уонна олохтоохтор кыттыылаах өрө көтөҕүллүүлээх кэнсиэринэн түмүктэннэ. Ыалдьыттар – Нерюнгри оройуонун Иенгра сэлиэнньэтин уонна Амур уобалаһыттан кэлбит дьүүллүүр сүбэ – эмиэ туора туран хаалбатылар.
Дьиэ кэргэн династиятын күрэҕэ “Языковое гнездо” социальнай бырагыраама чэрчитинэн ыытыллар соҕотох тэрээһин буолбатах. Ол курдук, кулун тутар 11 күнүгэр Тээнэ сэлиэнньэтигэр билим-быраактыка кэмпириэнсийэтэ ыытылынна. Манна оскуола үөрэнээччилэрэ эбэҥки үгэстэригэр, сиэригэр-туомугар, фольклоругар, ырыатыгар-туойугар, үҥкүүтүгэр аналлаах дакылаат аахтылар. Маны таһынан бу бырагырааманы олоххо киллэрии боппуруостарыгар икки күннээх төгүрүк остуол буолла.
“Языковое гнездо” бырагыраама ыалдьыттара, дьүүллүүр сүбэтэ ыраах сиртэн муһуннулар: Саха сирин улуустарыттан, Дьокуускай куораттан уонна Амур уобалаһыттан.
Тээнэҕэ тэрээһин түмүктэммитин кэннэ, ааспыт бээтинсэҕэ, ол эбэтэр кулун тутар 14 күнүгэр, Өлүөхүмэ оройуонун киинигэр – Өлүөхүмэ куоратыгар – этнограф Виктор Васильев “Тунгусы Алдано-Майского и Аяно-Охотского районов” кинигэтэ сүрэхтэннэ. Ону гуманитарнай чинчийии уонна хотугу норуоттар кыһалҕаларын үөрэтэр институт көҕүлээн тэрийдэ. Кинигэни Нордголд хампаанньа үбүлээн таһаартарда.
Нордголд хампаанньа пресс-сулууспата.
