Кулун тутар 21 күнүгэр, ол эбэтэр Хомоҕой хоһоон аан дойдутааҕы күнүгэр, кырдьаҕас Бүлүү куоратыгар үлэ бэтэрээнэ, сэрии кэмин оҕото, суруйааччы, Суруйааччылар сойуустарын норуоттар икки ардыларынааҕы түмсүүтүн уонна СӨ Суруйааччыларын сойууһун чилиэнэ, Бүлүү куорат өрөгөй ырыатын ааптара Николай Иванович Иванов-Сиэн Моттой 80 сааһыгар анаммыт үөрүүлээх тэрээһиннэр буолан аастылар.
Ол курдук, ити күн сарсыарда өттүгэр Бүлүү бибилэтиэкэлэрин кииннэммит ситимин дьиэтигэр “Хоһооннорум – кынаттаах иэйиилэрим” диэн улуустааҕы уус-уран ааҕыы күрэҕэ дьону-сэргэни үмүрү тарта.
Тэрээһиҥҥэ оскуола оҕолоро, араас идэлээх дьон, хомоҕой хоһоону таптааччылар мустан бэйэлэрэ талбыт хоһооннорун уус-ураннык ааҕан иһитиннэрдилэр.
Кииннэммит бибилэтиэкэ үлэһиттэрэ, мэлдьи да буоларын курдук, киэҥ ис хоһоонноох быыстапканы бэлэмнээтилэр. Онно Сиэн Моттой кинигэлэрэ, кини айар үлэтигэр анаммыт суруйуулар, архыып матырыйааллара ууруллубуттарын дьон сэҥээрэн, кэрэхсээн билистэ.
Салгыы күн иккис аҥаарыгар М.Н. Жирков аатынан улуустааҕы култуура киинигэр “Сүрэҕим сааһырыан баҕарбат...” диэн дьоро түһүлгэ төрүттэннэ.
Онно уус-уран ааҕыы күрэҕин кыттыылаахтара, Бүлүүтээҕи холбоһуктаах хуор, “Ай-ыллаа” ырыаһыттар ансаамбыллара, Иван Гоголев-Кындыл Уйбаан аатынан норуот тыйаатыра, улуус ымыылаах ырыаһыттара кытыннылар. Быыстапка туруорулунна, кинигэ атыыта тэрилиннэ.
Дьоро түһүлгэҕэ Николай Иванович Иванов-Сиэн Моттой айымньытыгар сүгүрүйээччилэр, уран тылга умсугуйааччылар, уран суругу кэрэхсээччилэр уонна аймах-билэ дьоно кэлэн кини үрдүк үөрүүтүн үллэһиннилэр, хомоҕой хоһоон абылаҥар, ыллам ырыа алыбыгар куустардылар, ирэ-хоро кэпсэттилэр, дуоһуйа сынньаннылар.
Улуус баһылыга Сергей Николаевич Винокуров итинник өрөгөйдөөх түгэҥҥэ Николай Иванович Иванов-Сиэн Моттойго “Бүлүү улууһун култууратын уонна үрдүк айылгытын эйгэтигэр үтүөлэрин иһин” диэн түөскэ кэтэр бэлиэни, ытык-мааны суруйааччыны айыы сааһыгар эрчимнээхтик үктэммитинэн итиитик-истиҥник эҕэрдэлээн туран, үөрүүлээхтик туттарда.
Дьоро түһүлгэ ити курдук истиҥ, иһирэх, бэйэтэ туспа эйгэлээх, ураты тыыннаах тэрээһининэн буолла.
