“ZA_ZA” бренд төрүттээччитэ, дизайнер Александра Корякина бу күннэргэ Мумбаи куоракка ыытыллар Lakme Fashion Week – Индия муода нэдиэлэтигэр саҥа кэллиэксийэтин билиһиннэриэҕэ. Ол туһунан СӨ Култуураҕа уонна духуобунай сайдыыга министиэристибэтин телеграм ханаала иһитиннэрэр.
Александра этэринэн, кини саҥа кэллиэксийэтэ Болливуд киинэлэрин дьоруойдарын сөҕө-махтайа көрөр кэммитигэр төттөрү илдьэр. Бу иннинэ Lakme Fashion Week тэрээһиҥҥэ Саха сириттэн ким да кыттыбатах, онон Александра хамаандатын кытта муода уонна дизайн устуоруйатыгар киириэхтэрэ.
Санатан эттэххэ, Александра Корякина – Дьокуускайдааҕы технология уонна дизайн кэллиэһин бүтэрбитэ. Кини онно үөрэнэ сылдьан, үс кэллиэксийэни айан таһаарбыта. 2023 сыллаахха дизайнер “СӨ култууратын туйгуна” бэлиэнэн наҕараадаламмыта.
Сонун төрдө, хаартыска: СӨ Култуураҕа уонна духуобунай сайдыыга министиэристибэтин телеграм-ханаала
