Сунтаар улууһун киинигэр Сергей Зверев-Кыыл Уолун аатынан Норуот айымньытын дьиэтигэр «Аан дойду норуоттарын хомуһун түмэлин уонна киинин» уопсастыбаннай филиала кулун тутар 27 күнүгэр үөрүүлээх быһыыга-майгыга аһыллан үлэлии турар. Тэрилтэ сүрүн соруга – хомуһу тардыы олохтоох үгэстэрин харыстааһын, үөрэтии уонна тарҕатыы.
Муниципальнай филиалы арыйыыны көҕүлээбит, кэнсиэпсийэтин толкуйдаабыт киһинэн хомуһу сыыйа тардыы төрүт үгэһин харыстааччы уонна тарҕатааччы, энтузиаст-чинчийээччи, СӨ култууратын туйгуна Антонина Никитина буолар. Кини этиитин «Аан дойду норуоттарын хомуһун түмэлин уонна киинин» дириэктэрэ Дмитрий Бястинов уонна Норуот айымньытын дьиэтин дириэктэрэ Алексей Седалищев өйөөннөр, филиал тэриллэн оҕо уонна ыччат аймах сөбүлээн сылдьарыгар анаан тупсаҕай дьиэлэннэ-уоттанна.
Култуураны кытта үөрэҕи дьүөрэлиир уопсастыбаннай филиал үлэтин дизайыныгар тиийэ торумнаабыт Антонина Никитина филиал ис бараанын билиһиннэрдэ:
– Дьиэбит балаҕаннаах өттүгэр оҕолору былыргылыы хомус эйгэтигэр киллэриэхпит. Манна олорон, көмүлүөк уотун, сытын-сымарын ылан, саха тээбиринин, аһын-үөлүн сэргэ хомуһу кытта билсиэхтэрэ, сыыйа тардарга үөрэниэхтэрэ. Аныгы оҕолорго интэриэһинэй буоллун диэн, биир хоско Куйаар хомус диэн сырдатар тэрили ыйаатыбыт. Маны холбоон баран, оҕолорго космос куйаарыгар бастакынан хомустаабыт космонавт Олег Кононенко туһунан кэпсиибит уонна оонньоон иһитиннэрэбит.
Бэйэ кэр.
