Муус устар 5 күнүгэр норуоттар икки ардыларынааҕы “Звезда - 2025” диэн ырыа куонкуруһун саҥа сезона саҕаланна. “Звезда” федеральнай ханаалга куонкурус сүүмэрдиир түһүмэҕин бастакы биэриитэ таҕыста. Манна Саха сирин аатыттан биир дойдулаахпыт Валерия Миронова уон биирис киһинэн туйгуннук ыллаан муҥутуур 100 баалы ылла. Дьүүл сүбэтэ кини куолаһын, толоруутун олус үрдүктүк сыаналаата.
Валерия Алдан оройуонун Аллараа Кураанах бөһүөлэгэр төрөөбүт. Алта сааһыттан ырыанан дьарыктанан саҕалаабыт. Айар куонкурустарга кыттан элбэхтик кыайар, ансаамбылга ыллыы сылдьыбыт эбит. Аскольд Муров аатынан Новосибирскайдааҕы муусука колледжын эстрада уонна джаз салаатын бастыҥ устудьуона буолбут. Маны таһынан, Гнесин аатынан Арассыыйатааҕы судаарыстыбаннай академия эстрада уонна джаз салаатын бүтэрбит.
Быйылгы “Звезда - 2025” куонкуруска Арассыыйа бары эрэгийиэннэриттэн, Туркменистантан, Белоруссияттан, Казахстантан 92 ырыаһыт кыттар. Дьүүллүүр сүбэ бэрэссэдээтэлинэн биллиилээх композитор, РФ норуодунай артыыһа Максим Исаакович Дунаевскай буолар. Валерия кыттыбыт биэриитин зазвезду.рф саайтка киирэн көрүөххүтүн сөп.
Бэйэ кэр.
