Бүгүн Өрөспүүбүлүкэтээҕи медиа-киин саалатыгар кэрэ аҥаарга туох да ирдэбили уонна хааччаҕы туруорбат, толору көҥүлү биэрэр, тутулуга суох «Мисс Новая Якутия-2025» ураты уонна кэрэ буолуу куонкуруһун тэрийээччилэрэ уонна кыттааччылара суруналыыстары кытта көрүстүлэр.
Икки сылга биирдэ ыытыллар куонкурус гранд-финалыгар 20 кэрэ аҥаар бастыҥ буолар иһин күрэстэһиэхтэрэ. Манна киирбит кэрэ аҥаардартан саамай эдэрдэрэ 22 саастаах, оттон саамай аҕалара 42 саастаах.
Кэлбит дьон хараҕа тута от күөҕэ бархат сыттыкка ууруллубут дьэрэкээн хоруонаҕа быраҕылынна. Бу «Харысхал» ювелирнай фирма уран оҥоһуга үрүҥ көмүстэн кутуллубут, кэрэ бэйэлээх изумруд тааһынан киэргэтиллибит, сыаната - 700 тыһ. солк. тахса. Симэҕи муус устар 25 күнүгэр «Триумф» уораҕайыгар сүүрбэ кэрэ куоттан биирдэстэрин кэрэчээн төбөтүгэр кэтэрдиэхтэрэ. Хоруона хаһаайкатын кытта икки сылы быһа сылдьыаҕа.
Дьүүл сүбэтин бэрэссэдээтэлэ, «Три кита» креативнай ааҕыныстыба салайааччыта Сахаайа Гоголева гранд-финалга ыллыахтаах биллиилээх артыыс Дима Билан туһунан ыйытыыга хоруйдаата:
- Ырыаһыт Дима Билан олус үрдүк таһымнаах, сыаналанар артыыс. Кини Саха сиригэр сүүрбэ сыл анараа өттүгэр кэлэ сылдьыбыта. «Сулуһу» кытта кэпсэтиини икки сыллааҕыта саҕалаабыппыт. Ол түмүгэр сөбүлэһэн уон түөрт киһилээх хамаандатын (дириэктэрин, бэк-вокалистарын, мусукааннарын, кордебалетын) илдьэ кэлэр буолла. Дмитрий, Саха сиригэр кинини олус кэтэһэллэрин билэн баран, кэпсэтиллибит кэминээҕэр уон мүнүүтэнэн (икки ырыанан) уһуннук ыллыах буолла. Бу иһиттэххэ дуона суох курдук эрээри, улахан ырыаһыкка олус улахан суолталаах.
Маны таһынан, Сахаайа Гоголева инники былааннарын арыйда. Холобура, быйылгы кытааччылар ортолоругар «Мисс Россия» куонкурус ирдэбилигэр сөп түбэһэр кыргыттар бааллар эбит. Ол иһин дириэксийэни кытта дьаныһан кэпсэтии ыыппыттар. Ол түмүгэр, «Топ-40» киирбит кыттааччы Милена Худогизова «Мисс Россия» куонкуруска кытта барар кыахтаммыт. Өссө икки сылынан куонкуруһу «Мисс Дальний Восток» таһымыгар ыытыахтарын уонна аан дойду таһымыгар таһаарыахтарын баҕараллар .
Куонкурус режиссера Петр Черкашин пресс-кэмпириэнсийэҕэ «Мисс Новая Якутия-2025» кэмигэр чаҕылхай шоу буолуо диэн эрэннэрдэ. Кини полуфиналы хайдах тэрийбитинэн көрдөххө, гранд-финал чахчы да оннук буолар чинчилээх. Петр этэринэн, балтараа чаастаах туруорууга кыргыттар сценаҕа хаста даҕаны тахсан хаамыахтара, үҥкүүлүөхтэрэ. Үгэс быһыытынан, соһуччу перформанс баар буолуо. Режиссер инники «кибербуллинг» тиэмэтигэр туруорбут буоллаҕына, быйыл «Мин – дьахтарбын!» диэн тиэмэҕэ туруорбут. Ол эбэтэр, дьахтар тус баҕатын уонна көҥүлүн сарбыйыы туһунан. Ол эрээри «бу феминизм туһунан буолбатах» диэн кини чопчулуур.
Тэрийээччилэр быйыл бириис пуондата икки төгүл улааппытын бэлиэтииллэр. Ол курдук, «Мисс Новая Якутия-2025» ааты сүкпүт кэрэ аҥаар массыына ыларга 1 мөл. солк. сууммалаах сэртипикээти тутуоҕа. Вице-мисс «Доктор Дубинина» эстиэтикэлии стоматология килиинньикэтигэр 600 тыһ. солк. сэртипикээти, оттон II-с Вице-мисс «Харысхал» ювелирнай фирматтан 400 тыһ. солк. сэртипикээти тутуохтара.
Настаабынньык Айыына Пудова этэринэн, кыргыттар куонкуруска бэлэмнэниигэ күҥҥэ уон иккилии чааска тиийэ ыыталлар. Үгүстэрэ улахан сценаҕа бастакытын хаамаллар, бастакытын үҥкүүлүүллэр, хобулугунан бастакытын хаамаллар. Ол иһин кинилэр бары хорсун санаалаахтар. Онон, муус устар 25 күнүгэр кыргыттары барыларын үчүгэйдик өйүүргүтүгэр, элбэх ытыс тыаһын бэлэхтииргитигэр ыҥыраллар.
Тэрээһини сырдатта КҮНДЭЛИ.
