Маннык ураты уус-уран ааттаах быыстапка киин куорат “Арт-Ситим” галереятыгар арылынна.
Онуоха, биир дьиктитэ диэн, худуоһунньук Сардана Иванова дьиҥнээх аата Сардаҥа диэн эбит. Ол курдук, ааспыт үйэ сэттэ уонус сылларыгар Сунтаар оройуонун “Бордоҥ” сопхуоһугар эдэр исписэлиис быһыытынан ананан үлэлии кэлбит Вера Спиридоновна уонна Юрий Егорович Ивановтар дьиэ кэргэннэригэр кыыс оҕо күн сирин көрөр. Эдэр ыал кыыстарын олорор сирдэрин иккис аатынан Сардаҥа диэн ааттыыллар. Онтулара төрөөбүтүн туһунан туоһутугар Сардана диэн буолар. Аат докумуоҥҥа нууччалыы суруллар буоллаҕа. Оттон нуучча алпаабытыгар ҥ буукуба суох.
Кыыска, тоҕо эрэ, Саргы диэн аат иҥэр. Аймах-билэ дьоно, дьүөгэлэрэ, доҕотторо кинини ити аатынан билэллэр.
Салгыы Саргы-Сардана П.П. Романов аатынан Дьокуускайдааҕы ойуу-дьүһүн кыһатын үөрэнэн бүтэрэр. Онно кинини Арассыыйа Худуоһунньуктарын сойууһун чилиэнэ, СӨ урамньытын үтүөлээх диэйэтэлэ Пётр Альбертович Ласс дьарыктыыр, уһуйар.
Онтон идэтинэн “Саха” НКИ хампаанньаҕа үлэлээн барар. Ол сырыттаҕына кинини дьон худуоһунньук Сардаана Иванованы кытта бутуйарын билэр. Хайаларын даҕаны нууччалыы “Сардана” диэн суруйар уонна сахалыы “Сардаана” диэн ааттыыр буоллахтара.
Ити туһунан Сардаана Владимировна, билигин АГИКИ дассыана, уонна Сардаҥа биһирэм кэмигэр иһирэхтик ахтан аастылар.
Сардаҥаны инники уонна бу үһүс быыстапкатыгар көҕүлээбит худуоһунньук, урамньыһыт, АГИКИ бэрэпиэссэрэ Анна Григорьевна Петрова-Кэрэһит кини хартыыналара араас хайысхаҕа ойууламмыттарын, худуоһунньук билигин бэйэтин ураты суолун көрдүүр кэрдиис кэмҥэ сылдьарын туһунан эттэ.
ХИФУ бэрэпиэссэрэ Александр Николаевич Ким-Кимэн Сардаҥа мэтириэти дьон уратытын таба тутан ойуулуурун бэлиэтээтэ.
ИДьМ бэтэрээнэ Пётр Николаевич Петров Сардаҥа кэргэн тахсан, оҕолонон, атын сиргэ көһөн идэтиттэн тэйэ сылдьан баран, билигин күүскэ ылсан үлэлээн эрэрин биһирээтэ, саҥа быыстапка кини дьулуурун, хорсунун, үлэһитин көрдөрөр диэтэ уонна худуоһунньугу Сахатын сиригэр, тыыннаах айылҕатын далбарыгар, төннөн айымньылаахтык үлэлииригэр ыҥырда.
Сардаҥаны үһүс быыстапката арыллыбытынан Нам улууһун I Хомустаах нэһилиэгин баһылыга Василий Гаврильевич Жирков, архитектура билимин хандьыдаата, АГИКИ дассыана, “Эйгэ” бириэмийэ төрүттээччитэ Ирина Алексеева, модельер, урамньы билимин хандьыдаата Зинаида Заболоцкая, урбаанньыт, Сунтаар “Корона” фирматын дириэктэрэ Надежда Григорьевна Львова, худуоһунньук, СӨ урамньытын үтүөлээх диэйэтэлэ Андрей Чикачев, “Күрүлгэн” сурунаал сүрүн эрэдээктэрэ Афанасий Гуринов-Арчылан итиитик-истиҥник эҕэрдэлээтилэр, аны даҕаны сонун үлэлээх саҥа быыстапкалары эрэнэ күүтэллэрин эттилэр.
“Саҥа Сардаҥа” быыстапка “Арт-Ситим“ галереяҕа бэс ыйын 13 күнүгэр диэри үлэлиир. Онтон салгыы Сардаҥа төрөөбүт-үөскээбит Сунтаарыгар Кыыл Уолун аатынан улуустааҕы айымньы киинигэр бэс ыйын 17–24 күннэригэр туруоҕа.
Биһирэмҥэ эппиттэрин курдук, төрөппүттэрэ кыыстарын айар суолун өтө таайан ааттаабыттар. Ону быыстапкаҕа сылдьыбыт дьон Сардаҥа төрөөбүт дойдутугар ахтылҕаныттан айыллан, дьүһүйүллэн тахсыбыт хартыыналарыгар бэйэлэрэ бэркэ билэр дьоннорун номоҕон мөссүөннэрин, тулалыыр айылҕаларын мааны көстүүлэрин уу харахтарынан кэрэхсии көрөн илэ бааччы итэҕэйиэхтэрэ.
АРЧЫЛАН.
