Д.К. Сивцев – Суорун Омоллоон аатынан Судаарыстыбаннай опера уонна балет тыйаатыра XXXI Бүтүн Арассыыйатааҕы тыйаатыр бириэмийэтин түмүктүүр тэрээһинигэр «Сияющий камень» этно-балетынан үс «Көмүс маасканы» ылла.
Ол курдук, «Сияющий камень» балет сүрүн «Балет» номинацияҕа бастыҥынан ааттанна. Мария Кузьмина дьахтар оруолун бастыҥ толорооччу буолла. Иван Шандровскай худуоһунньук бастыҥ үлэтин иһин наҕараадаланна. Испэктээк композитора - Кирилл Герасимов, либретто ааптара - Владислав Левочкин, туруоруута - Екатерина Тайшина.
Бириэмийэлэри туттарыы Казань куоракка бастакытын Г. Камал аатынан Татаар судаарыстыбаннай академическай тыйаатырыгар ыытылынна. Манна Арассыыйа 170 куоратыттан 734 туруоруунан сайаапка киирбититтэн эспиэрдэр сүбэлэрэ 45 испэктээги уонна 90 тыйаатыр диэйэтэлин талан кытыннардылар.
Сонун төрдө: СӨ Бырабыыталыстыбатын уонна Ил Дарханын пресс-сулууспата
