Амма улууһун Сулҕаччы сэлиэнньэтигэр «Экстра Синема» ситим Саха сиригэр 79-с киинэ саалатын үлэҕэ киллэрдэ.
Сэлиэнньэҕэ билигин 468 киһи олорор. 150 олорор миэстэлээх киинэ саалата Христофор Максимов аатынан култуура уонна сынньалаҥ киинигэр арылынна.
Бастакынан көрдөрүллэр чиэска Валентин Макаров устубут «Куулэй. От кэмэ» хартыыната тигистэ. Киинэни көрө нэһилиэнньэ чиэппэрэ кэллэ.
«Бу биһиэхэ улахан суолталаах түгэн буолла. Дьон киинэ көрө таарыйа кэпсэтэллэр-ипсэтэллэр, сонуннарын үллэстэллэр. Аны оҕолорго, эдэр ыччакка туспа тыыннаах эбии сынньалаҥ сирэ буолла», - диэн кулууп дириэктэрэ Жанна Максимова кэпсээтэ.
https://vk.com/wall-47459109_10534
Билигин кулууп үлэһиттэрэ киинэ хартыыналарын картотекатын ырыта, чинчийэ сылдьаллар –аныгыскы премьераҕа диэри ханнык урут тахсыбыт киинэлэри көрдөрөллөрүн сыымайдыыллар. Көрөөччүлэр НКИК «Саха» эрдэ тахсыбыт сериал матыыбынан устубут «Омоон Суоллар» киинэтин премьератын күүтэллэр.
Кинилэр «Экстра Синема» ситим суотабай телефоннарга анаан оҥорбут сыһыарыытын нөҥүө билиэт атыылаһар уонна көрүөхтэрин баҕарар киинэлэригэр куоластыыр кыахтаахтар.
Ол аата, репертуары чопчулуурга быһаччы кытталлар. Анал сыһыарыыны бу сигэнэн киирэн телефоҥҥутугар туруорунуоххутун сөп – https://www.rustore.ru/catalog/app/ru.extra_cinema.app
Киинэ көрдөрөн эбии дохуот киллэринэр кыаҕы аммалар бэркэ туһанан эрэллэр. Бу иннинэ эмиэ ити курдук саалалар Болугурга, Эмискэ, Бөтүҥҥэ арыллыбаттара.
Билигин Саха сиригэр 79 киинэ саалата үлэлиир. «Экстра Синема» комплекстара Арассыыйатааҕы сибээс министиэристибэтин испииһэгэр киирбиттэрэ (https://reestr.digital.gov.ru/search/?q=%D0%AD%D0%BA%D1%81%D1%82%D1%80%D0%B0+%D1%81%D0%B8%D0%BD%D0%B5%D0%BC%D0%B0). Онон бу комплекстары араас култуура, үөрэх уонна инфраструктура сайдыытыгар туһуламмыт бырайыактарга туһаныахха сөп.
