“Сахафильм” Судаарыстыбаннай национальнай хампаанньа өйөбүлүнэн быйыл 9 уус-уран уона 1 документальнай киинэ тахсаллара былааннанар. Саппай уопсан, «Күүлэй», «Олох түгэннэрэ. 10 сыл кэннэ», «Золото Тойон Бая: Дневник геолога», «На краю света», «Сиэр», «Айан да Айан», «Саҥа Боотур», «Хаар кынат», «Бүгүн-Былыр-3», «Мой сын» диэн хартыыналар тахсыахтара.
Бу эйгэҕэ быйыл күүтүллэр муҥутуур суолталаах тэрээһиннэр – IX Саха сирин норуот икки ардынааҕы киинэ бэстибээлэ, «Чыпчаал» киинэ бириэмийэлэрин туттарыы уонна “Киинэ өрөспүүбүлүкэтэ” диэн кылгас метражтаах киинэлэр бэстибээллэрэ.
Дойдубут бэрэсидьиэнэ Владимир Путин сорудаҕынан, быйыл толору цикллээх киинэ устар павильон барылын уонна сметатын докумуоннарын бэлэмниир үлэ саҕаланыахтаах.
Санатан эттэххэ, ааспыт сыл түмүгүнэн саха киинэлэрэ муҥутуур элбэх үбү-харчыны хомуйбуттара (280 мөл. солкуобай). Олору барыта 561 тыһыынча киһи киинэ тыйаатырдарыгар көрбүттэрэ. Ордук элбэх харчыны «Диодорова. Против течения», «Кончится лето», «Спид Стар», «Мин аатым Таптал», «Мой парень – Айдол!» хартыыналар хомуйбуттара.
2020 сыллаахтан Саха сиригэр сылын аайы киинэ оҥоруутун сайыннарарга уонна техническэй өттүнэн саҥардарга диэн бүддьүөттэн субсидия ыларга туһуламмыт күрэх ыытыллар. Алта сыл иһигэр 45 бырайыак 125,3 мөл. солкуобай субсидияны ылбыта. Оннук өйөбүлү туһанан барыта 17 киинэ таҕыста (10 уус-уран, 4 документальнай уонна 3 анимационнай).
СӨ Ил Дарханын уонна бырабыыталыстыбатын пресс-сулууспата.
