Валентин Макаров устубут ити хартыыната көрдөрүү бастакы күнүгэр 2 264 139 солкуобайы “өлөрбүт”. Сэттиэлэ түмүгүнэн барыта 10 960 046 солкуобай хаассаҕа киирбит.
Киинэ ис хоһооно кылгастык суруйдахха маннык.
Ньургун олоҕун тухары аҕатыгар син киһи тэҥэбин диэн өйдөтө сатыыр. Онто отой сатаммат. Эбиитин, пицца аҕалан биэрэр курдук судургу үлэтиттэн кытары уураталлар. Санаата-оноото урусхалланан эрдэҕинэ фитнес-блогер дьарыктаах атаһа Сарыал кэлэр. Уонна күүлэйгэ кыттарын устарыгар “миигинниин барыс” диэн ыҥырар.
Ньургун тыа сиригэр кэлэн билбитэ – бу буолуохтаах күүлэй сэлиэнньэ дьылҕатыгар улахан суолталаах эбит. Аны туран, Сарыал от охсоору бэлэмнэнэ сылдьан эчэйэр. Кини оннугар хайаан да ким эбит кыттыахтаах. Ньургунтан атын ким да суох буолан биэрэр...
Валентин Валентинович Макаров – режиссер, Саха академическай тыйаатыр уонна Олоҥхо тыйаатырын артыыһа. 1988 сыллаахха төрөөбүтэ. АГИИК бүтэрбитэ. Ордук биллибит киинэлэрэ –«Дьулуур: мас-рестлинг» уонна «Мин аатым Таптал».
