Алмаастаах хампаанньа Арассыыйа биир саамай улахан эрэгийиэнигэр олорор төрүт омуктар тылларын харыстыырга анаммыт көҕүлээһиннэри мэлдьи өйүүр.
Олортон биир саамай тутаах суолталаахтара – оҕо аймахха төрөөбүт тылга тапталы иҥэрэр бырайыактар. АЛРОСА өйөбүлүнэн “Колодец сказок” диэн өрөспүүбүлүкэтээҕи куонкурус буолан ааспыта. Кинигэҕэ киирбит остуоруйалары оҕолор бэйэлэрэ айан суруйбуттара, ойуутун-дьарҕаатын бүтүннүү уруһуйдаабыттара. Оҕолор айбыт 50 бастыҥ остуоруйалара нууччалыы, сахалыы уонна эбэҥкилии тылынан кинигэ буолан тахсыбыта. Ону сэргэ ол дьикти-дьиибэ остуоруйаларынан кылгас кэрчиктээх ойуулуктар уһуллан, билигин “Саха” НКИХ “Тооку” ханаалыгар көстө тураллар. Аҕааччылар көрдөһүүлэринэн, кинигэ 2025 сыллаахха хоһуттан бэчээттэнэн тахсыбыта.
Итини сэргэ АЛРОСА хампаанньа иккититтэн биэһигэр диэри саастаах оҕолору саха тылыгар сыһыарар туһугар, “Токо Саһылчаан” диэн элбэх сиэрийэлээх сахалыы ойуулугу оҥорбута. Аны култуура нэһилиэстибэтин тарҕатар аныгы үстүрүмүөн быһыытынан “Мир Кындыкан” анимация сэрийээлин ааттыахха сөп. 10 сиэрийэлээх бырайыак дьоруойдара хотугу көс олохтоох дьон үгэстэрин уонна олохторун туһунан эбээннии кэпсииллэр.
АЛРОСА Хотугу аҕыйах ахсааннаах төрүт омуктар ассоциацияларын кытта бэчээт көҕүлээһиннэригэр уонна култуура бырайыактарыгар улахан болҕомтону уураллар. Ол курдук, 2025 сыллаахха элбэх үлэ бэчээттэнэн, хос бэчээттэнэн таҕыста. Ол иһигэр “Памятники этнической культуры” сиэрийэ иһинэн “Зима и лето, как фрагменты языковой картины мира эвенов”, “Материальная культура коренных малочисленных народов Севера Якутии” каталог, “Параллельный мир юкагира. Сновидения”, “Русско-тундренный юкагирский словарь. 1-4 классы”, “Личные имена эвенков”, уонна Саха сирин Төрөөбүт тылларын учууталларын ассоциациятын сүбэтинэн “Под светом таежного созвездия: сохранение наследия предков” уо.д.а. үлэлэр.
Кинигэ, билим үлэлэрин таһаарбытын таһынан, АЛРОСА оҕолорго уонна улахан дьоҥҥо аналлаах эбэҥки тылын куурустарын, нимкаланнар куонкурустарын өйүүр, сыллата ыытыллар СӨ хотугу аҕыйах ахсааннаах төрүт омуктарын төрүт бырааһынньыктарын тэрээһинигэр көмөлөһөр.
Өрөспүүбүлүкэ хотугу төрүт омуктарын өйүүр көҕүлээһиннэргэ өссө СӨ Национальнай бибилэтиэкэтин пуондатыгар илиинэн суруллан харалла сытар култуурунай артефакторы сыыппараҕа көһөрүү, сүтэн эрэр тыллар аудиовизуальнай пуондаларын тэрийии киирэр.
АЛРОСА хампаанньа уонунан сыллар усталарыгар Саха сирин уһулуччулаах дьонун аатын ураты бөдөҥ алмаастарга иҥэрэр үгэстээх. Ол курдук, араас кэмҥэ литэрэтиирэ, тыл маастардарын аатынан маннык алмаастар сүрэхтэммиттэрэ: “Платон Ойунский” (1983), “Писатель Николай Якутский” (1989), “Софрон Данилов” (1993), “Писатель Суорун Омоллоон” (1996), “Писатель Яковлев-Далан” (1997), “Анемподист Софронов-Алампа” (2019), “Афанасий Уваровский” (2000), “А.Е. Кулаковский – Өксөкүлээх” (2012), “Семен Данилов” (2014), “Иван Михайлович Гоголев-Кындыл” (2019), “Курилов Семен Николаевич” (2021), “Кривошапкин Андрей Васильевич” (2022), “Тарабукин Николай Саввич” (2022), “Елена Васильевна Слепцова-Куорсуннаах” (2023), “Василий Назарович Егоров-Тумарча” (2024).
Быйыл сахаттан бастакы лингвист-учуонай, сырдатааччы, реформатор, саха национальнай суругун-бичигин төрүттээччи, сахалыы бастакы учуобунньуктар ааптардара Семен Андреевич Новгородов төрөөбүт күнүгэр, олунньу 13 күнүгэр, Төрөөбүт тыл уонна сурук-бичик күнэ номнуо 30 сылын бэлиэтэнэр. Оттон 2022 сыллаахха АЛРОСА туруупкатыттан көстүбүт 53,65 караат ыйааһыннаах алмааһыгар “САССР судаарыстыбаннаһын 100 сылыгар 100 аат” бырыайыак чэрчитинэн С.А. Новгородов аата иҥэриллибитэ.
АЛРОСА социальнай уонна култуурунай бырайыактары бэйэлээтэр бэйэтин Сахатын сиригэр олорор норуоттар олохторун таһыма тупсарын, төрүт култууралара чөл буоларын, сайдарын туһугар олоххо киллэрэр.
kyym.ru
